“Game of Thrones” цувралын Жон Сноугийн дүрээр дэлхийд танигдсан жүжигчин Кит Харингтон HBO-ийн “Harry Potter” цувралын хоёрдугаар улиралд Гилдерой Локхартын дүрийг бүтээхээр болжээ.
Кит Харингтон уг дүрд өмнө нь сонгогдсон жүжигчин Николас Холтыг орлож байгаа юм. Николас Холтыг Гилдерой Локхартын дүрд сонгогдсон тухай дөнгөж наймдугаар сарын 12-нд мэдээлсэн боловч бусад төслүүдийн зураг авалтын хуваарьтай зөрчилдсөнөөс тэрбээр “Harry Potter” цувралаас гарсан байна. Түүний оролцож буй бусад төслүүдийн зураг авалтын хуваарийг HBO-ийн үйлдвэрлэлийн төлөвлөгөөтэй уялдуулах боломжгүй болсон гэж мэдээлжээ.
Сонирхолтой нь Кит Харингтон Гилдерой Локхартын дүрийг бүрэн шинээр бүтээж байгаа биш. Тэрбээр 2025 онд гарсан “Audible”-ийн “Harry Potter: The Full-Cast Audio Editions” аудио номын “Chamber of Secrets” хувилбарт Гилдерой Локхартын дүрд дуу оруулсан байна. Тиймээс жүжигчин уг дүрийн зан чанар, ярианы хэв маягтай хэдийнэ танил болсон гэж үзэж байна.
HBO-ийн шинэ “Harry Potter” цувралын эхний улирал 2026 оны арванхоёрдугаар сарын 25-нд HBO болон HBO Max сувгаар гарч эхэлнэ. Эхний улирал “Harry Potter and the Philosopher’s Stone” номын үйл явдлыг өгүүлэх бол хоёрдугаар улирал “Harry Potter and the Chamber of Secrets” номд төвлөрнө.
Ийнхүү Кит Харингтон Вестеросын Жон Сноугоос Хогвартсын хамгийн өөртөө итгэлтэй, нэр алдарт дуртай багш нарын нэг болох Гилдерой Локхартын дүрд шилжихээр болж байна.
