Жил бүр уламжлал болон зохиогддог “Болор цом” 30 дахь удаагийн наадам өчигдөр болж өнгөрсөн. Наадамд их аварга Д.Дагвадоржоос эхлүүлээд үе үеийн “Болор цом”-ын эзэд, ахмад яруу найрагчид, урлаг соёлын одод ирцгээсэн байв. Тэр дунд нэгэн сонирхолтой зочин ирсэн нь нэрт яруу найрагч О.Дашбалбар агсны охин Д.Индра байв.
Драмын театрийн тэргүүн эгнээнд тухлан суух О.Дашбалбар найрагчийн охиноос зарим телевиз ярилцлага хүртэл авч харагдсан.
Д.Индра соёл судлаач мэргэжилтэй бөгөөд аавынхаа төрсөн өдөрт зориулж “Эх орон-Оюун санаа-Яруу найраг” наадмыг зохион байгуулж, шүүгчээр нь ажиллаж байсан яруу найраг, утга зохиолд элэгтэй нэгэн.
СУИС-ын Соёл иргэншлийн сургуулийн багшаар ажилладаг Д.Индра нэгэн хэвлэлд өгсөн ярилцлагадаа “Миний амьдралд өдөр тутам мөрдөгддөг зарчим бол аавын захидаг байсан “Амьддаа бие биеэ хайрла” гэх үгийг хүмүүсийн чихэнд биш сэтгэлд хүргэх явдал юм” гэж хэлсэн байдаг.
Д.Индра хэдийгээр О.Дашбалбар агсны хууль бус эхнэрээс нь төрсөн охин гэж нэрлэгддэг ч энэ үгэнд эмзэглэдэггүй гэдгээ ч хэлдэг. “Миний аав, ээж хоёр хайр сэтгэлээрээ учирч, аав ээжид минь зориулж “Шанзны эгшиг”, “Дарьганга аялгуу” гэсэн хоёр бүтээлээ туурвисан.
Тиймээс Төрийн соёрхол хүртсэн.
Энэ бүтээлүүдийг бичүүлэх гэж ээж минь төрсөн ч юм шиг. Миний ээж Анимаа бол жинхэнэ яруу найрагчийн хайр нь, онгод нь болох заяатай эмэгтэй гэж би боддог” хэмээж байсан юм.
М.Кэйт
