Улсын дуурь, бүжгийн эрдмийн театрын уран бүтээлчид өнөөдөр Ж.Пуччинийн хөгжим Л.Иллизи, Ж.Жакоза нарын цомнол, дөрвөн үзэгдэлт “Богема” дуурийг тайзнаа тоглох гэж байна. Анх 1896 оны хоёрдугаар сарын 1-нд Турин хотын “Реджо” театрт тоглож байсан тус дуурийг 1849 онд А.Мюржегийн бичсэн “Богемчуудын амьдрал” хэмээх романаас сэдэвлэн бичжээ.
Ж.Пуччини энэ уран бүтээлээр өөртөө авьяас хэмээх асар их баялаг бүхий уран бүтээлч залуус мөнгөгүйгээс болж ямар өрөвдмөөр, үл үзэгдэх зовлонг туулж байгаа тухай маш мэдрэмтгий, илэн далангүй өгүүлэхийн сацуу гэнэн цайлган, аливаа асуудлыг дандаа сайн сайхан талаас нь хардаг хүмүүсийн тухай илэрхийлэхийг зорьсон байна. Пуччинийн хувьд энэ бүхэн Миланы хөгжмийн дээд сургуульд сурч байх үеийнх нь амьдралыг санагдуулсан дурсамжууд байсан тул бодит сэтгэлгээнээс ургасан хийгээд байгалиас заяасан авьяас билэгтэй хүмүүсийн хувь заяа, хүн төрөлхтөнд агуу зүйлийг үлдээдэг боловч эмгэнэлтэй байдаг тухай хөгжмийн хэлээр яруу дүрсэлж чадсан дуурийн урлагийн хамгийн уянгалаг дууриудын нэг юм.
Өнөөдөр тайзнаа амилах “Богема” дуурийг Урлагийн гавьяат зүтгэлтэн Н.Туйлаахүү удирдах бөгөөд дуурийн гол дүр болох яруу найрагч Рудольфт Б.Гомбо-Очир, зураач Марсельд Э.Анхбаяр, хөгжимчин Шонарт Ц.Баттөр, гүн ухаанч Колленд О.Хүрэлбаатар, байрны эзэн Бенуад Э.Бумхүү, Альциндорт Б.Алтанхуяг, Рудольфын бүсгүй Мимид Ө.Уянга, Мюзеттад Н.Туяа, Парпиньол тоглоом худалдагчийн дүрд М.Даваадорж, гаалийн түрүүчэд Э.Бумхүү нар тоглох ажээ.
