Монголын рок поп хөгжмийн ертөнцөд өөрийн гэсэн томоохон орон зайг бий болгосон гитарчин Д.Өлзий-Орших өөрийн ертөнц дэх аялгууг үзэгчиддээ хүргэх нь ээ. Тэрбээр ирэх арваннэгдүгээр сарын 1, 2-нд 19.00 цагт “UB palace”-т бие даасан амьд хөгжмийн тоглолтоо толилуулахаар товоо зарлаад байгаа юм.
Тоглолтод түүний зохиосон “Хайрын бурхан”, “Чи минь”, “Дурлаж бичсэн шүлэг”, “Чамайг санахдаа” зэрэг дуунаас гадна Д.Өлзий-Оршихын гитарын гоцлолууд эгшиглэх аж. Түүний тоглолтод Гавьяат жүжигчин Б.Сарантуяа, Т.Ариунаа, Ж.Алтанцэцэг, “Никитон”, “Харанга”-ын Х.Лхагвасүрэн, “Хурд”, “Хөх тэнгэр”, “Камертон”, “Лемонс”, “Номин талст”, “Гурван охин”, “Мотив” хамтлаг болон дуучин Солонго, Агиймаа, Б.Амархүү, С.Сэрчмаа нар оролцох нь ээ. Түүнчлэн 90-ээд оны залуусыг байлдан дагуулж байсан “Титэм” хамтлагийнхан ая дуугаа өргөнө гэсэн шүү.
Сонирхуулахад, түүний тоглолтод 1986 онд зохиож байсан анхны уран бүтээл болох “Үнэнч сэтгэл” дууг дуучин С.Сэрчмаа энэ л үдэш үзэгчдэд дахин хүргэнэ гэсэн шүү. Мөн тоглолтод
“…Надад чамаас өөр харамлах юм үгүй
Надад чамаас өөр хайрлах хэн ч үгүй
Өөрийнхөөрөө л би чамайг тултал хайрлалаа
Харин чи над шиг дурлаж чадах уу…” хэмээх “Никитон” хамтлагийн “Чи над шиг дурлаж чадах уу” хэмээх түүний цоо шинэхэн дуу уг тоглолтод анх удаа эгшиглэх нь ээ.
www.URLAG.mn
