МУГЖ Ж.Оюундарьтай саяхан дэлгэцнээ гарсан “Хөлтрөг” УСК-ны талаар ярилцсанаа хүргэж байна.
-Та “Хөлтрөг” кинонд ямар дүр бүтээсэн бэ?
-Миний хувьд хүн гэж хэлэхэд хэцүү, хүн биш гэж хэлэхэд хэцүү нэг тийм дүрд тоглосон. Би урьд нь хэзээ ч ийм дүрд тоглож байгаагүй.
-Тийм үү, дүрийн тань гол онцлог юу юм бол?
-Уран бүтээлч, жүжигчин хүн аливаа дүрд яг л байгаагаараа тоглодог. Харин энэ дүрд яг байгаагаараа тоглоё гэхээр маш хэцүү. Их сонин өвөрмөц дүр дээр ажилласан.
-Энэ зун өөр ямар шинэ уран бүтээл дээр ажиллав?
-Бид зун долоодугаар сар гээд амарчихдаг. Энэ хугацаанд Гантулга найруулагчийн “Голланд сарнай”, СТА Ц.Төмөрхуягийн “Ёстой гажиг” гээд инээдмийн кинонд тоглосон. Дорноговь руу явж бас нэг кинонд тоглосон. Нийтдээ таван уран бүтээлд оролцсон. Одоо “Эцсийн зогсоол чи” гээд инээдмийн жүжигт ажиллаж байна.
-Дараа дараагийн уран бүтээлээ төлөвлөчихсөн л биз дээ?
-“Гамлет” жүжигт тоглох гэж байгаа. Мөн “Би ч гэсэн жаргамаар байна” жүжгийн гол дүрийг бүтээх гэж байна. Бас хоёр киноны зохиол ирсэн, одоогоор уншиж танилцаад л байж байна.
-Жүжигчин хүн тухайн дүрдээ орчихдог, тэгээд дүрээсээ гарах их хэцүү байдаг гэдэг. Таны хувьд?
-Тоглож байгаа дүрдээ 100 хувь орно гэж бараг байхгүй. Хэрвээ 100 хувь дүрдээ орчихвол хагас галзуурлын байдалд орчихно.
-Жүжигчин болох гэж байгаа залууст хандаж зөвлөгөө өгөөч?
-Жүжигчин хүнд “хүн чанар” гэдэг хамгийн чухал. Хэчнээн уулын оргилд хүрсэн ч гэлээ биеэ тоож болохгүй. Өөрт байгалиас заяасан авьяасыг маш их тордох хэрэгтэй. Аливаа зүйлд шантарч болохгүй, дайчин, шаргуу байх хэрэгтэй гэж боддог. Мөн тухайн тоглох гэж байгаа дүрийн зохиолоо маш сайн уншиж, судлах хэрэгтэй. Тэгж чадах юм бол сайхан дүр, сайн уран бүтээл төрдөг гэж боддог.
-Та хэр их зантай вэ?
– Хүн оргилд хүрэх тусам даруухан байх хэрэгтэй гэж манай ээж, аав хоёр хэлдэг юм. Хамраа сөхөж болохгүй, хүн чанараа алдахгүй байж л хүн болно. Чиний харьцаж байгаа хүн ямар ч хүн байж болно. Хэзээ нэгэн цагт тэр хүн ч мөн адил оргилд хүрнэ. Тиймээс бусадтай эелдэг зөөлөн харьцах хэрэгтэй.
С.Сумхүү
Эх сурвалж: mass.mn
