Монгол Улсын Хүүхэлдэйн театр нь он солигдох мөчид хүүхэд бүрийн хүсэн хүлээдэг баярыг нь хамтдаа тэмдэглэдэг уламжлалтай билээ. Тэд энэ жилийн бэлгээ задаллаа. Бяцхан үрсдээ шинэ жилийн баяраар их тайзнаа Английн хурц үгийн мастер Оскар Уайльдын “Одноос төрсөн ханхүү” үлгэрийн драмыг толиуулах бол бага тайзнаа С.Маршакын “Тэнэг бяцхан хулгана” жүжгийг үзэгч багачууддаа хүргэх нь ээ.
Оскар Уайльдын “Одноос төрсөн ханхүү” үлгэрийн драм бүхэлдээ үлгэрийн ид шидийн ертөнцөд өрнөх бөгөөд одод хэн нэгний төлөө асаж унтарч байдаг хэн нэгний төлөө л хүмүүс амьдардаг, хүмүүс од шиг бусдад гэрэл гэгээ түгээж амьдрахын утга учрыг бяцхан үзэгчдэд толилуулах юм байна. Уг зохиолыг бичсэн Ирланд гаралтай, Английн философич, яруу найрагч, зохиолч Оскар Уайльд нь өөрийн хоёр хүүхэддээ зориулан “Аз жаргалтай ханхүү буюу бусад үлгэрүүд”, “Анаран байшин” нэртэй хоёр үлгэрийн цомог гаргажээ. Энэ удаад Хүүхэлдэйн театрын уран бүтээлчид бяцхан үзэгчдэдээ зориулан түүний “Аз жаргалтай ханхүү буюу бусад үлгэрүүд” үлгэрийн цомгоос нь сэдэвлэн “Одноос төрсөн ханхүү” үлгэрийн драмаар бэлэг барьж байгааг дуулгая.
Энэхүү жүжгийг МУХТ-ын найруулагч Соёлын тэргүүний ажилтан М.Ариунтуяа найруулж, хөгжмийн зохиолчоор Хоовон хэмээн нэрийддэг Урлагийн гавьяат зүтгэлтэн, ая зохиогч, хөгжимчин Г.Энхбаяр бичиж, МУХТ-ын нийт уран бүтээлчид оролцсон томхон хэмжээний уран бүтээл болж байгаа аж. Энэ сарын 25-аас ирэх оны нэгдүгээр сарын 1-ийг дуустал өдөр бүр 15.00 цагт тоглогдох юм байна.
Харин бага тайзнаа энэ сарын 21-ээс өдөр бүр 13.00 цагт С.Маршакын “Тэнэг бяцхан хулгана” жүжгийг тоглох юм байна.
Түүнчлэн хүүхэлдэйн театр нь 40 хүртэлх хүүхэд багачуудын анги хамт олны, байгууллага хамт олны үр хүүхдүүдийнх нь шинэ жилийн баярыг хамтдаа тэмдэглэн үлгэрийн баатруудтай хамт мартагдахааргүй нэгэн үдшийг дурсгал болгон мөнхөлж байгаа юм шүү.
Шинэ жилийн тоглолтын тасалбарын хувьд их тайзнаа тоглох О.Уайльдын “ Одноос төрсөн ханхүү” үлгэрийн драмыннх 15 төгрөг бөгөөд бэлэгтэй гэсэн шүү. Бага тайзнаа тоглох С.Маршакын “Тэнэг бяцхан хулгана” жүжгийн тасалбар 2500 төгрөг юм байна.
Бяцхан үрсээ үлгэрийн ертөнцөөр аялуулан шинэ жилийн бэлэг бариарай.
