Гарамгай хөгжимчдийн хэмээн тодотгож явуулдаг, шилдэг үндэсний, сонгодог уран бүтээлчид, өсвөрийн хөгжимчдийн нэгдсэн “Virtuoso Gala Concert-2024” тоглолт энэ сарын 31-нд Улсын филармонид болно. Зохион байгуулагч нь “Виртүс” академи.
21 дэх жилдээ үзэгчдэд хүргэх гэж буй уг тоглолтод улиран одох дөхөж буй онд эх орондоо болон олон улсын тайзнаа амжилт гаргасан 17 уран бүтээлчийг сонгон урьжээ. Тэдгээрээс энэхүү тоглолтод хоёр дахь удаагаа залагдсан морин хуурч Б.Энх-Амгаланг онцлон танилцуулъя.
Тэрбээр түрүү жил Консерваторийг морин хуурч мэргэжлээр төгссөн бөгөөд эдүгээ Морин хуурын чуулгын хөгжимчин юм. Манай улсад энэ оны зун болсон Морин хуурын олон улсын VII наадмын хүрээнд явуулсан Мэргэжлийн морин хуурчдын олон улсын уралдаанд тэргүүлсэн амжилтаар нь уг нэгдсэн тоглолтод урьсан байна. Залуу хуурч сүүлийн жилүүдэд гадаадын нэр хүндтэй олон тайзнаа Монголын хөгжмийн зохиолчдын морин хуурт зориулсан бүтээлүүдийг эгшиглүүлжээ.
Морин хуурын өлгий Монголоос морин хуурч олон төрдөг. Мэргэжлийнхэн цөөнгүй. Тэр дундаа гарамгай нь хуруу дарам ховор. Хөгжим судлаачид ер нь морин хуурчдын тухай, цойлж, товойсон зарим нэгийнх нь тухай амттай сайхан яриа өрнүүлсээр байдаг. Тэр яриан дундаас “Тулхтай, хариуцлагатай, амбицтай нь морин хуурыг үнэнхүү эзэмшдэг дээ” гэсэн өгүүлбэр чих дэлсэж байсан удаатай. Үүнийг залуу морин хуурч Б.Энх-Амгаланд хаяглаж болохоор мэт.
Мөн одоогоос хоёр жилийн өмнө УДБЭТ-ын хамт олон Ж.Вердийн “Макбет” дуурийг тайзнаа анхлан тавих үеэр Ардын жүжигчин А.Долгор “Шинэ бүтээлээр уран бүтээлч төрөх, гарч ирэх гэдэг ойлголт байдаг. Энэ удаа “Макбет” дууриар Макбет жанжны дүрийг бүтээсэн дуурийн гоцлооч, баритон Л.Бүүвэйбаатар гарч ирлээ” гэж хэлж байсан юм.
Үүнчлэн өнгөрсөн зун Өмнөговь аймагт болсон Морин хуурчдын олон улсын VII уралдаанаар морин хуурч Б.Энх-Амгалан гарч ирсэн билээ. Тэрбээр “Virtuoso Gala Concert-2024”-т хөгжмийн зохиолч, Урлагийн гавьяат зүтгэлтэн Ш.Өлзийбаярын “Glissando and Spiccato” бүтээлийг тоглож, үзэгчдийн сэтгэл, оюуныг хөглөх болно.
