“Фантастик” продакшны жүжигчин Б.Барслхагва тэргүүтэй уран бүтээлчдийн оролцон тоглосон “Vivant” олон ангит кино “Tokyo drama awards-2024” наадмын Гранпри шагнал хүртжээ.
Японы Токио хотноо болсон эл арга хэмжээ нь 17 дахь удаагаа зохион байгуулагдаж буй бөгөөд уг шагналыг Японы продюсеруудын холбоо, Японы телевизүүдийн холбооны продюсеруудын саналаар сонгож олгодог ажээ.
Сонирхуулахад, “Vivant” олон ангит киноны гол үйл явдал зохиомол Балка улсад өрнөх бөгөөд Улаанбаатар, Дархан, говьд зураг авалтыг нь хийж, бодит эффект болон компьютер график ашиглан Балка улсыг харуулсан байдаг. Түүнчлэн уг кинонд Монголоос жүжигчин Б.Барслхагва, Г.Эрхэмбаяр, Х.Цасчихэр нар дүр бүтээсэн.
Жүжигчин Б.Барслхагва Японы “TBS” телевизэд тоглосон бүтээлийнхээ талаар “Япон надад яг л зүүдний ертөнц шиг л санагдсан. Би 2022 оны аравдугаар сард “Vivant” киноны шалгаруулалтад орж, арваннэгдүгээр сард эл киноны дүрд сонгогдсоноо мэдсэн. 2023 оны 1-4 дүгээр сарын хооронд зураг авалтдаа оролцохоор Японд анх ирсэн. Долдугаар сард Японд хоёр дахиа ирэхэл таксины жолоочоос авахуулаад олон хүн намайг таньж, “Зургаа авахуулж болох уу, Та “Vivant”-ын Чингис мөн үү” гэж асуухад гайхалтай мэдрэмж төрсөн” хэмээн ярилцлага өгч байв.
