Энэ өвлийн хамгийн шилдэг үзвэрүүдийн нэг энэ сарын 12-ны ням гаригт Дуурь бүжгийн эрдмийн театрын тайзнаа болох гэж байна.
Өөрийн суут хөгжмийн бүтээлээрээ дамжуулан үзэгчдийг үлгэр туульсын ертөнцөд аваачиж чадсан дэлхий дээрх цорын ганц хөгжмийн зохиолч бол П.И.Чайковский юм. Мөн дэлхий дахинаа гоо зүйн дээд хэмжүүр хэмээн хэлэгддэг балетын урлагийн сор бүтээл болох “Хунт нуур” бүжгэн жүжиг нь аль ч улсын театрын хамгийн олон үзэгчтэй үзвэрүүдийн нэг одоо ч байсаар байна.
АНУ-ын “Бостон” балетын компанийн гоцлоочоор ажиллаж буй гавьяат жүжигчин Д.Алтанхуяг эх орондоо хүрэлцэн ирсэн төдийгүй ирэх ням гаригт “Хунт нуур” бүжгэн жүжгийн ханхүү Зигфридийн дүрийг бүтээхээр бэлтгэлдээ оржээ.
Түүний энэ удаад эх орондоо ирэх болсон шалтгаан нь өөрийн удирдан явуулдаг “Балетын хөгжил сан”-гийн ажил бус, Дуурь бүжгийн эрдмийн театрын балетын жүжигчин өөрийн “алтан” хамтрагч гавьяат жүжигчин Ч.Ганчимэгийг “гавьяат” цолтон болсонтой холбогдуулан хүрэлцэн ирж хүндэтгэл үзүүлж байгаа гэнэ. Учир нь Хөгжим бүжгийн коллежид байхаас эхлэн нэгэн ангид суралцаж, балетын жүжигчний хувьд дэлхийн тайзнаа гарах хүртлээ Д.Алтанхуяг нь Ч.Ганчимэг балетчинтай олон удаа хослон бүжиглэж байсан төдийгүй Д.Алтанхуягийг гавьяат цол авахад түүний хослон бүжигчин шинэхэн гавьяат Ч.Ганчимэгийн нөлөө их байсан гэж мэргэжлийн хүмүүс ярьж байна. Тиймээс энэ удаад гавьяат жүжигчин Д.Алтанхуяг “Хунт нуур” бүжгэн жүжгээр Монголын үзэгчидтэй уулзахаар болжээ. Харин түүний хослол бүжигчин буюу цагаан хун Одетта, хар хун буюу Оделлиягийн дүрд Дуурь бүжгийн эрдмийн театрын балетын гоцлооч Б.Саруул, хорон санаат хар шувуу Ротбартын дүрд балетын жүжигчин Х.Мөнгөнхөлөг нар оролцон тоглох ажээ.
Хэдэн ч удаа үзсэн уйдамгүй хүн төрөлхтний бүтээсэн хосгүй урлагийн бүтээлүүдийн нэг болох П.И.Чайковскийн “Хунт нуур” бүжгэн жүжиг энэ удаад Монголын балетын урлагийн нэр хүндийг дэлхийн тавцнаа өндөрт өргөн яваа балетчдын нэг Д.Алтанхуягийн авьяастай хамт тайзнаа амилах гэж байна.
“Хунт нуур” балетын гайхамшиг нь хар, цагаан хун, ханхүүгийн дүрдээ бус хар, цагаан хун, ханхүүд чухам ямар авьяас чадвартай, хэн гэдэг балетын жүжигчин хэрхэн тоглож байгааг харахдаа байдаг гэдгийг балетын урлагийг шимтэн сонирхогч үзэгч олон андахгүй сайн мэдэх тул энэ удаагийн үзвэрийг алдахгүй үзнэ гэдэгт найдаж байна.
Мөн дүн өвлөөр “Хунт нуур”-ыг үзэх яагаад ч юм нэг л дулаахан, халуухан, жинхэнэ өвлийн хамгийн гайхалтай мэдрэмж байдаг тул эрхэм уншигч та энэ удаагийн үзвэрт яараарай…
Э.ОДГЭРЭЛ/Үндэсний шуудан/
