ОХУ-ын Москва хотын Гнесиныхний нэрэмжит Москвагийн хөгжмийн академийн оюутан М.Хайрат тайзнаа анхны дүрээ бүтээлээ. Тодруулбал, М.Хайрат “Фигарогийн хурим” нэртэй хошин дуурийг ОХУ-ын Урлагийн гавьяат зүтгэлтэн , профессор Ю.А.Сперанскийн найруулснаар өчигдөр /2024.12.23/ тавихад Антониогийн дүрийг бүтээсэн байна.
Эл дуурийг Пьер Бомаршегийн “La folle journée, ou le Mariage de Figaro” хэмээх зохиолд үндэслэн Вольфганг Амадей Моцарт болон Италийн зохиолч Лоренцо Да Понте нарын хамтран 1786 онд зохиосон байна.
М.Хайрат нь Монгол Улсын Ерөнхийлөгч У.Хүрэлсүхийн санаачилсан “Ерөнхийлөгчийн илгээлт-2100” тэтгэлэгт хөтөлбөрийн хүрээнд Гнесиныхний нэрэмжит Москвагийн хөгжмийн академид профессор Тимофей Юрьевич Крюковын удирдлагад дуурийн дуучин мэргэжлээр хоёр дахь жилдээ суралцаж байгаа юм. Тэрбээр энэ арванхоёрдугаар сарын 15-нд ОХУ-ын Санкт-Петербург хотод XX зууны нэрт дуурийн дуучин, ЗХУ-ын Ардын жүжигчин Елена Образцовагийн соёлын сангаас зохион байгуулсан сонгодог болон ардын урлагийн олон улсын VIII уралдаанаас “Оросын хөгжмийн зохиолчийн ари” төрөлд “шилдэг дуулаачаар нэрлэгдээд буй.
