“Оскар”-т хүрэх түлхүүр гэгддэг “Screen Actors Guild Awards” наадмын /SAG Awards/ шагнал гардуулах ёслол ирэх хоёрдугаар сарын 23-нд Лос-Анжелес хотод болно.
Мюзикл, уран зөгнөлт жанрын “Wicked” уран сайхны кино энэхүү наадмын хамгийн олон шагналд нэр дэвшжээ.
Тодруулбал, “Бродвей”-н алдартай мюзиклээс сэдэвлэсэн “Wicked” кино нь “SAG Awards” наадмын дээд шагнал болох шилдэг жүжигчдийн баг болон шилдэг эмэгтэй гол дүр, шилдэг эрэгтэй, эмэгтэй туслах дүр зэрэг нийт таван номинацад нэр дэвшсэн байна.
Харин Америкийн дуучин Боб Диланы амьдралаас сэдэвлэсэн “A Complete Unknown” кино дөрвөн төрөлд өрсөлдөх бол өнгөрсөн ням гараг /2025.01.05/-т болсон “Алтан бөмбөрцөг”-ийн ялагч “Emilia Perez” гурван шагналд нэр дэвшжээ.
Эдгээр гурван кинотой өнгөрсөн жилийн Каннын кино наадмын дээд шагналыг хүртсэн “Anora” кино мөн өрсөлдөх төлөвтэй буй аж.
Түүнчлэн гол дүрийн шилдэг эмэгтэй жүжигчин шагналын төлөө “Wicked” киноны од Синтиа Эриво, “Алтан бөмбөрцөг”-ийн эзэн Деми Мур /”The Substance”/ нараас гадна Памела Андерсон /”The Last Showgirl”/, Карла Софиа Гаскон /”Emilia Perez”/, Майки Мэдисон /”Anora”/ нар өрсөлдөж байна.
“SAG Awards” ёслолын үеэр мөн телевизийн салбарын шилдгүүдийг тодруулдаг бөгөөд Японы түүхэн сэдэвт “Shogun” драмын цуврал таван номинацад нэр дэвшсэн байна. Уг цуврал нь “Эмми”, “Алтан бөмбөрцөг” наадмуудын гол шагналуудыг хүртээд буй юм.
“SAG Awards”-ын нэр дэвшигчдийн бүрэн жагсаалтыг ЭНД-ээс харах боломжтой.
