Богдын хүрээ хотыг дүрсэлсэн монгол зургийн тусгай үзэсгэлэнг анх удаа олон нийтэд дэлгэнэ. Тодруулбал, нийслэл хүрээний 113 жилийн ойг тохиолдуулан “Богдын хүрээ хотыг дүрсэлсэн монгол зураг (XVIII-XX зууны эхэн үе)” сэдэвт тусгай үзэсгэлэнг 2025 оны хоёрдугаар сарын 7-ноос гуравдугаар сарын 1-нийг хүртэл “Монгол арт” галерейд олны хүртээл болгох гэж байна.
Үзэсгэлэн гурван хэсгээс бүрдэнэ. Үүнд:
- Богдын хүрээ хотыг дүрсэлсэн монгол зураг
- Богдын хүрээ хотыг харуулсан гэрэл зураг
- Видео танхимд үзүүлэх баримтат нэвтрүүлэг
Үзэсгэлэнгийн ерөнхий зохион байгуулагчаар нийслэлийн Соёл, урлагийн газар, Улаанбаатар хотын музей, “Монгол арт” галерей ажиллаж бөгөөд Богд хааны ордон музей, Занабазарын нэрэмжит Дүрслэх урлагийн музей, Улаанбаатар хотын музей, “Монгол арт” галерей, Үндэсний төв архив, Үндэсний номын сан, Швейцарь Улсын Базел хотын Соёлын музей зэрэг музей, архивын сан хөмрөг, хувийн цуглуулагчдад хадгалагдаж буй Богдын хүрээ хотыг харуулсан нийт 30 шахам монгол зургийн бүтээлийг анх удаа нэгдсэн байдлаар дэлгэн үзүүлж буйгаараа онцлогтой юм.
Үзэсгэлэнгээр ХVIII-ХХ зууны эхэн үед холбогдох Богдын хүрээний бүтэц, зохион байгуулалт, түүхэн үйл явдал, баяр наадам, төрийн ёслолыг дүрсэлсэн энэхүү бүтээлүүдээр дамжуулан Богдын хүрээ ямар хот байсан, монгол зурагт хэрхэн дүрслэгдсэн, эдгээр бүтээлүүд ямар үнэ цэнтэй зэргийг олон нийтэд сурталчлан таниулах зорилготой юм.
Тус үзэсгэлэнд 1870-аад оны үед Богдын ордны зураачийн зурсан “Их хүрээ хот” хэмээх шинээр олдсон монгол зургийг анх удаа эх хувиар олон нийтэд долоо хоногийн хугацаатай дэлгэн үзүүлэх ба Их хүрээ баялаг өгүүлэмжтэй, дахин давтагдашгүй монгол зургийг шинээр амилуулсан хуулбар зургийн нээлтийн ёслолын ажиллагаа болно.
Уг шинэ хуулбар зургийг “Монгол арт” галерейн зураач, МУЭ-ийн гишүүн Ц.Оюун-Эрдэнэ дөрвөн жилийн хугацаанд бүтээж, мөн сүүлийн гурван жил Улаанбаатар хотын музейн эрдэм шинжилгээний ажилтан Г.Очбаярын хамт түүх, зураг урлалын судалгааг хийж буй аж.
