Хеви метал хөгжмийн эцгүүд, үүсгэн байгуулагчид гэгддэг Английн алдарт “Black Sabbath” хамтлаг анхны бүрэн бүрэлдэхүүнээрээ эргэн нэгдэж, сүүлчийн удаа тоглолт хийхээр болжээ. Ийнхүү “Black Sabbath” хамтлагийн анхны бүрэлдэхүүн болох дуучин Оззи Осборн, гоцлол гитарчин Тони Айомми, басс гитарчин Гизер Батлер, бөмбөрчин Билл Уорд нар 20 жилийн дараа ийнхүү дахин нэгдэж бүтэн өдрийн фестиваль зохион байгуулж, тоглохоор боллоо.
2025 оны долдугаар сарын 5-ны өдөр Английн Бирмингхэм хотноо болох “Back to the beginning” хэмээн нэрлэсэн энэхүү метал хөгжмийн фестивальд мөн “Metallica”, “Pantera”, “Slayer”, “Gojira”, “Anthrax”, “Lamb of God”, “Mastodon” зэрэг алдартай хамтлагууд оролцохоор болсон байна.
Сонирхуулахад, “Back to the beginning” фестиваль нь мөн хандив цуглуулах зорилготой бөгөөд цуглуулсан бүх хандивыг Паркинсон өвчний эсрэг тэмцэх Их Британийн “Cure Parkinson’s” хандивын сан, “Acorn Children’s Hospice” хүүхдийн асрамжийн газар, Бирмингхэм хотын хүүхдийн эмнэлэгт олгохоор болжээ. Учир нь “Black Sabbath” хамтлагийн үүсгэн байгуулагч, өдгөө 76 настай алдарт рок дуучин, “Харанхуйн хунтайж” хочит Оззи Осборн Паркинсоны өвчин болон нуруу нугасны гэмтлээс болоод уран бүтээлээ завсарлаад байсан юм.
