Өмнөд Солонгосын жүжигчин Ким Се Рун 24-хөн насандаа таалал төгслөө.
Түүнийг ням гараг (2025.02.16)-ийн 16.55 цагийн үед Сөүл хотын Соенсү-дун дүүрэг дэх гэрээс нь нас барсан байдалтайгаар олжээ. Одоогоор нас барсан шалтгаан нь тодорхойгүй байгаа бөгөөд энэ талаар олон нийтэд мэдээллээгүй байна.
2000 онд төрсөн Ким Се Рун нь хүүхэд ахуйгаасаа уран бүтээлийн гараагаа эхэлж, дэлгэцийн анхны уран бүтээлдээ есөн настайдаа тогложээ.
2009 онд “A brand new life” кинонд тоглож, улмаар 2010 онд “The man from nowhere”, 2014 онд “A girl at my door” уран сайхны кинонд тоглосноор тэрбээр олны танил болсон юм.
Мөн түүнийг “Listen to my heart” (2011), “The queen’s classroom” (2013), “Hi! School: Love on” (2014), “Secret healer” (2016) зэрэг телевизийн олон ангит кинонд тоглосноор нь үзэгчид андахгүй мэднэ.
