Г.Занабазарын нэрэмжит Дүрслэх урлагийн музей нь 16000 гаруй үзмэр, цуглуулгын баялаг сан хөмрөгтэй бөгөөд жил бүр ховор нандин дахин давтагдашгүй үзмэр, цуглуулгаасаа тусгай, сэдэвчилсэн үзэсгэлэнгүүдийг зохион байгуулж, эрдэм шинжилгээ, судалгааны эргэлтэд оруулах, өөрийн улс болон гадаад улс орны соёл хоорондын харилцаа, түүх, урлаг, соёлын тухай ойлголтыг олон нийт, хүүхэд залууст сурталчлан таниулах зорилгоор ажиллаж ирсэн уламжлалтай.
Тэгвэл энэ удаа “Энэтхэгийн соёл, гар урлал”-ын үзэсгэлэнг дэлгэх гэж байна. Тус үзэсгэлэнд Энэтхэг улсын XIX-XX зууны гар урлал, гоёл чимэглэл, яс, төмөр, модон сийлбэрийн урлаг, гэрэл зураг зэрэг өвөрмөц сонирхолтой бүтээлүүдийг олон нийтэд толилуулах юм. Үзэсгэлэн хоёрдугаар сарын 20-ноос гуравдугаар сарын 1-нийг дуустал үргэлжилнэ.
