“Nike” компани Ким Кардашьяны “Skims”-тэй хамтран “NikeSKIMS” нэртэй спорт хувцасны шинэ брэнд гаргахаар боллоо. Эхний коллекц энэ хавар худалдаанд гарч, 2026 оноос албан ёсны нээлтээ дэлхийн хэмжээнд хийхээр төлөвлөжээ. Энэхүү хамтын ажиллагаа нь “Nike”-д илүү олон эмэгтэй хэрэглэгч татах, “Lululemon”, “Alo yoga”, “Vuori” зэрэг брэндтэй өрсөлдөх боломжийг нээж өгөх юм.
Одоогоор “Nike”-ийн нийт худалдан авагчдын 40 хувийг эмэгтэйчүүд эзэлдэг ч тус компани энэ тоог өсгөх зорилт тавьжээ. Учир нь эмэгтэй худалдан авагчид хувцсанд илүү их мөнгө зарцуулдаг тул энэ нь “Nike”-ийн бизнесийн хувьд чухал өсөлтийн боломж гэж үзсэн аж.
“Skims”-ийн хувьд ч энэ хамтын ажиллагаа томоохон давуу талтай. Дөрвөн тэрбум ам.долларын үнэлгээтэй тус брэнд “Nike”-ийн үйлдвэрлэлийн хүчин чадал, нийлүүлэлтийн сүлжээг ашиглан зах зээлд илүү өргөн хүрээнд хүрэх боломжтой болно. Өмнө нь “Victoria’s Secret” зэрэг дотуур хувцасны брэнд спорт хувцасны зах зээлд хөл тавихыг оролдож байсан ч төдийлөн амжилт олоогүй. Мөн энэхүү хамтрал нь “Skims”-ийг хөрөнгийн зах зээлд нээлттэй компани болгох төлөвлөгөөг улам ойртуулж байна.
