“Killing me softly”, “I feel like makin’ love”, “The first time ever I saw your face” зэрэг хит уран бүтээлүүдийн эзэн дуучин Роберта Флэк 88 насандаа таалал төгсжээ. Тэрбээр өчигдөр /2025.02.24/ гэр бүлийнхнийхээ дэргэд амар тайвнаар нас нөгчсөнийг ойр дотнын хүмүүс нь мэдэгдлээ.
Роберта Флэк АНУ-ын Хойд Каролинад төрж, Виржиниагийн Арлингтонд өсжээ. Тэрбээр сонгодог төгөлдөр хуурчаар урлагийн гараагаа эхэлсэн бөгөөд 15-хан насандаа Ховард их сургуулийн бүрэн тэтгэлэгт хамрагдаж байв. Мэргэжилдээ эзэн болсон тэрбээр багшаар ажиллахын зэрэгцээ оройн цагаар дуурийн тоглолтод оролцож, хөгжимддөг, дуулддаг байсан аж.
Тэрбээр бага залуугаасаа дуулж эхэлсэн боловч жинхэнэ гялалзсан амжилтыг 30 орчим насандаа үзүүлсэн гэдэг. Энэ үед түүний дуулсан “The first time ever I saw your face” дууг 1973 онд нэрт жүжигчин, найруулагч Клинт Иствүүдийн “Play Misty for me” кинонд ашигласан юм. Улмаар тухайн жилдээ эл дуу Грэммийн шагнал хүртсэн юм. Ингээд зогссонгүй дараа жил нь буюу 1974 онд тэрбээр “Killing me softly” дуугаараа хоёр дахь удаагаа Грэммийн шагнал хүртэж байжээ. Роберта Флэк амьдралынхаа туршид Грэмийн шагналыг дөрвөн удаа хүртэж, “American music awards” шагнал гардуулах ёслын шилдгээр шалгарч байв.
Түүний амьдрал, уран бүтээлээс сэдэвлэсэн “Roberta” баримтат киног 2022 онд найруулагч Антонино Д’Амбросио найруулан, үзэгчдэд хүргэсэн байдаг.
