Номын зохиогч Ц.Дөлгөөн “Authentic Mongolia” номынхоо талаар “Амин хайртай Монгол эх орноо өөрийн сэтгэл зүрхээр мэдэрч, оюун бодлоор тунгааж, уншиж, мэдэж, судалж, өнцөг булан руу нь өөрийн биеэр аялж, ойлгож ухаарснаа ийнхүү ном болгон бичиж, та бүхэндээ өргөн барьж байна.
Бид монгол хүн болж төрсний хувьд өөрсдийн үүх түүх, соёл, өв, уламжлал, хэл, ёс заншил гээд бүхий л зүйлдээ жинхэнэ эзэн байж, ширхэг чулууг нь ч хайрлан хамгаалж, хамтдаа хүчирхэг ирээдүйг бүтээх учиртай гэдэгт би бат итгэдэг.
Эх оронд минь өнөө маргаашийн болж бүтэхгүй зүйл олон байгаа ч асуудалгүй улс орон, айл гэр гэж үгүй билээ. Ямар ч үед, бид дотроо үргэлж өөрсдийн үнэн мөн чанар, хүн чанар, бид хэн билээ, хэний үр сад билээ гэдгээ санаж, сэтгэл тэнүүн, харц дээгүүр, толгой өөдрөг явах ёстой.
Үүний тулд бид уг, язгуур, үндэснээсээ ямар чанартай, үзэл бодолтой, үүх түүхтэй хүмүүс вэ, түүнийг нь бүрэлдүүлдэг хүчин зүйлс нь юу вэ, тэдгээр чанарууд нь олон зуун жилийн турш амьд байж, өнөөдөр ч гэсэн бидний өдөр тутмын амьдаралдхэрхэн илэрч харагддаг вэ гэх мэт нандин, нарийн өнцөг барьж маш энгийн хэлбэрээр бичихийг зорив” гэсэн юм.
Authentic гэдэг бол жинхэнэ, бодит, элдэв нэмэлт өнгө будаггүй “ориг”, яг үнэнээрээ байгаа гэсэн утгыг давхар агуулдаг. Эх орноо худлаа магтахгүйгээр эгэл сайхныг нь нээж тайлбарлахыг, хүнээр бол дотор руу нь өнгийж, сэтгэл оюуныг нь “Authentic Mongolia” номоор уудалж танилцуулахыг хичээжээ.
Мөн тэрбээр “Дөргөн нуурын эрэг дээр суран бугуйл, өвөөгийнхөө дуранг үүрээд аз жаргалтай, ирмүүн харцтай залуу хөвгүүд хамаг хурдаараа ирээдүй рүү тэмүүлэн гүйж байгаа зураг… Тэд алхаагүй, шогшоогүй, бүр гүйж байна. Яаран тэмүүлэн догдлон аз жаргалтай гүйж байна.
Бидний Монгол Улс яг л энэ хоёр хүү шиг ирээдүйн зүг түүх соёл, өв уламжлалаа бахархалтайгаар тээн зоримог, өөдрөг, эрч хүчтэй, тэмүүлэн дүүлж яваа гэж би боддог” гэсэн.
Түүнчлэн “Түүхч, соён гэгээрүүлэгч, Монгол улсын анхны сэхээтнүүдийн нэг, МУБИС-ийн Сурганы тэнхимийг үүсгэн байгуулагч, хайртай өвөө Шарбандийн Маамхүүгийн гэгээн дурсгалд зориуллаа” хэмээн зохиогч онцолжээ.
