Улсын хүүхэлдэйн театрын хамт олон ирэх амралтын өдрүүдэд буюу гуравдугаар сарын 15, 16-нд 11.00 цагаас “Могжоохон даагатай Жогжоохон хүү”, 15.00 цагаас “Пиноккио” хүүхэлдэйн жүжгүүдээ хүүхэд багачуудад зориулан толилуулах гэж байна.
Найруулагч: М.Ариунтуяа
Хөгжмийн найруулга: Э.Базарханд
Ерөнхий зураач: В.Энх-Амгалан
Насны ангилал: 3+
Нэгэн өдөр Жогжоохон хүү зурамны нүх рүү ус хийж байтал ноёны түшмэл ирээд зам зайл гэсэнд хүү ийш тийш харж байгаад замаа чамайг зайл гэнээ гэсэнд түшмэл уурлана. Жүжиг цааш үргэлжлээд дээрэлхүү зальхай түшмэл ухаан сэргэлэн Жогжоохон хүүд үгээр дийлдэнэ. Ноён, хатан нарт зарга мэдүүлж шүүлгэх гэсэн боловч хүүгийн цэцэн цэлмэг ухааныг Хаан сайшаан тавьж явуулах бөгөөд зальхай уурт түшмэлийг цээрлүүлнэ.
Зохиолч: К.Коллоди
Найруулагч: Б.Анхбаатар
Зураач: Б.Анхбаатар
Насны ангилал: 6+
Бяцхан модон хүүхэлдэй “Пиноккио”-г Италийн нэрт зохиолч К.Коллоди дэлхий дахинд алдартай болгосноос хойш өдгөө хоёр дахь зууныхаа нүүрийг үзэх гэж байна. Худал ярих бүрд хамар нь урт болдог сахилгагүй хүүхэлдэйн сонирхолтой түүхийг хүүхэлдэйн олон төрлийг хөгжмийн зэмсэгтэй хослуулан хүүхэлдэйн театрын жүжигчдийн чадварлаг тоглолтоор үзэгчдийн хүртээл болгоход бэлэн боллоо. Хүүхэлдэй хэвээр үлдэх үү эсвэл хүн болох уу? Хэдийгээр үлгэр боловч тухайн зохиол нь бүх насны хүнд зориулсан зохиол юм.
