Дуучин, жүжигчин Селена Гомез сүүлийн жилүүдэд жүжигчний карьертаа түлхүү анхаарал хандуулж, давхар өөрийн үүсгэн байгуулсан “Rare Beauty” хэмээх косметикийн брэндээ хөгжүүлэн, хөгжмийн ертөнцөөс түр завсарлага аваад байсан билээ. Хамгийн сүүлд гэхэд л тэрбээр “Emilia Perez” кинонд тоглосон нь өнгөрсөн онд үзэгчдийн хүртээл болсон юм.
Харин өнгөрсөн сард тэрбээр “Scared of loving you“ нэртэй шинэ дуугаа Youtube платформд гэнэтхэн цацаж, мөн түүнчлэн “I said I love you first“ хэмээх шинэхэн цомгоо тун удахгүй сонсогчдын хүртээл болгох гэж буй талаараа мэдэгдсэн.
Тэгвэл саяхан Селена Гомез инстаграм хуудсаараа дамжуулан өөрийн шинэ цомогт багтсан дуунуудын нэрсийг шүтэн бишрэгчидтэйгээ хуваалцжээ.
Тус цомогт Селена Гомезын сүйт залуу Бенни Бланко хамтарсан гэдгээрээ онцлог бөгөөд “Younger and hotter than me”, “Bluest flame”, “Do you wanna be perfect” гэхчлэн нийт 14 дуунаас бүрдэх аж.
“I said I love you first“ цомог албан ёсоор гуравдугаар сарын 21-нд худалдаанд гарах ба цомгийн урьдчилсан захиалга эхэлжээ.
