ОХУ-ын “Doomers entertainment” студи “Золотая Орда: Выживание” буюу “Алтан Орд: Амьд үлдэх нь” хэмээх нэртэй тоглоом гаргах гэж байна. Тоглоомын үйл явдал нь Алтан Ордны Улсад гарсан бослогын үеэр нэгэн хоригдол шоронгоос оргосноор эхэлнэ. Тэрбээр ой санамжаа алдсан тул өөрийгөө хаанахын хүн гэдгээ мэдэхгүй. Монголчууд Оростой, бусад ард түмэнтэй байлдан, эзлэн түрэмгийлж байна. Хэнийх нь талд орох вэ гэдгээс гол баатрын хувь заяа шалтгаалах гэнэ.
Тоглоомыг зохиогч Ярослав Дунаевский “Тэр үед Алтан, Цагаан, Цэнхэр гээд хэд хэдэн орд байсан. Бид тоглоомоороо тэр үеийн монголчууд нэгдмэл байгаагүй, хоорондоо дайн дажинтай байсан гэдгийг харуулах зорилготой. Lumen, Nanite, Unreal Engine гээд шинэ технологи ашигласан тул дайн байлдаан яг бодит юм шиг болсон. Монголын эзэнт гүрний үе хүмүүсийн сонирхлыг татдаг ч айлгадаг сэдвийн нэг. Энэ сэдэвтэй тоглоом ч байхгүй. Учир нь студиуд Барууны иргэдэд зориулж тоглоом бүтээдэг. Харин бид Алтан Ордны улсад эзлэгдсэн байсан Орос, Хятад, Иран, Казахстан зэрэг орны зах зээлд орох болно. Манай тоглоомын ачаар залуус XIII зуунд Монголын газар нутагт амьдарч байсан ард түмнүүд, тэдний домогтой танилцах ач холбогдолтой” гэж мэдэгджээ.
“Золотая Орда: Выживание” тоглоомын эхний хувилбарыг 2025 онд багтаан гаргах аж.
