Японы Осака хотод зохион байгуулагддаг “Osaka Asian Film Festival” энэ сарын 14-23-нд болж өндөрлөлөө. 20 дахь удаагаа зохион байгуулагдсан эл олон улсын кино наадамд найруулагч Ж.Сэнгэдоржийн бүтээл “Чимээгүй хотын жолооч” уран сайхны кино өрсөлдөж, тус уран бүтээлийн гол дүрд тоглосон А.Түвшинбаяр Азийн шилдэг жүжигчин шагнал хүртлээ.
Бүжигчин А.Түвшинбаяр нь 2014 онд Хөгжим бүжгийн коллежийг төгссөнөөсөө хойш Үндэсний урлагийн их театрт ажиллаж буй бөгөөд 2015, 2017 онд ӨМӨЗО-д зохион байгуулсан Монгол бүжгийн их наадмаас алтан цом хүртэж, 2022 онд Ардын багш, Гавьяат жүжигчин, бүжиг судлаач, дэглээч, профессор Г.Долгорсүрэнгийн нэрэмжит гоцлол бүжигчдийн анхдугаар уралдааны тусгай байр, мөн онд “Nomadic” олон улсын уралдааны контемпорари төрөлд тэргүүн байр, мөн өнгөрсөн оны долдугаар сард БНСУ-ын Сөүл хотод “А” зэрэглэлийн олон улсын гоцлол бүжигчдийн уралдааны тэргүүн байрт тус тус шалгарч байв. Бүжгийн урлагт шимтэгсэд түүнийг “Хэлхээ намба”, “Тогууд”, “Orphan Swan”, “Дэггүй гурав” зэрэг бие даасан уран бүтээлээс нь гадна “Марко поло” мюзиклын Марко поло, “Монголын их хатад” бүжгэн жүжгийн Эсэн тайж, “Тэнгэрийн хутагт” бүжгэн жүжгийн Данзанравжаагийн дүрээр нь андахгүй.
