Америкийн “MTV” телевизээс зохион байгуулдаг “MTV Video Music Awards” хөгжмийн наадмын шагнал гардуулах ёслолыг “CBS” телевиз анх удаа дамжуулна гэж зохион байгуулагчид пүрэв гарагт мэдэгджээ.
Гурван цагийн турш үргэлжлэх шоуг есдүгээр сарын 7-ны ням гарагт Нью-Йорк хотын “UBS арена”-гаас CBS телевиз шууд дамжуулна. Мөн “MTV”-гээр нэгэн зэрэг нэвтрүүлэхээс гадна өнгөрсөн жилийн шоуг цацсан “Paramount+” платформоор мөн үзэх боломжтой.
“CBS” суваг нь “Tony Awards”, “American Music Awards” зэрэг олон шагнал гардуулах ёслолыг дамжуулдаг. Түүнчлэн 1973 оноос хойш “Grammy” наадмыг үзэгчдийн хүртээл болгож байгаа боловч 2027 оноос уг ёслолыг “ABC” телевиз дамжуулах ажээ.
Сонирхуулахад, өнгөрсөн жилийн “MTV Video Music Awards” наадмаас Тейлор Свифт хамгийн олон буюу долоон шагнал хүртэж, Пост Мэлоунтэй хамтарсан “Fortnight” дуугаараа дээд шагнал болох оны шилдэг клио” төрөлд шалгарсан юм. Ингэснээр Тейлор Свифтийн уг наадмаас хүртсэн нийт шагналын тоо 30-д хүрснээр наадмын түүхэн дэх хамгийн олон шагнал хүртсэн уран бүтээлч болох Бейонсетэй эн зэрэгцсэн. Харин тус наадмаас хамгийн олон шагнал хүртсэн эрэгтэй уран бүтээлч бол Эминем бөгөөд тэрбээр 15 шагналтай аж.
1984 оноос хойш тасралтгүй зохион байгуулж эл наадамд өнөө жил номинациудад өрсөлдөх нэр дэвшигчид болон шоуны тайзнаа үзүүлбэрээ толилуулах уран бүтээлчдийг наадам эхлэхийн өмнөхөн зарлана гэж зохион байгуулагчид мэдэгджээ.
