“Colossal biosciences” нэртэй биотехнологийн стартап өнөөдөр /2025.04.08/ мөхсөн амьтныг анх удаа амьдралд буцаан авчирсан гэж зарлалаа. Мөн тэр амьтан бол хүн төрөлхтний домог, түүхэнд нэр нь мөнхөрсөн dire wolf буюу үлэмж биет чоно юм.
Олон сая жилийн өмнө, мөсөн үеийн төгсгөлд амьдарч байсан dire wolf бол зүгээр нэг том чоно биш. Тэрбээр орчин үеийн саарал чононоос илүү хүнд жинтэй, илүү хүчтэй эрүүтэй, махчин анч амьтан байсан гэж судлаачид тодорхойлдог. Game of Thrones цуврал ч энэ амьтны нэрийг дэлхий даяар алдартай болгосон билээ.
“Colossal biosciences” компанийн баг мөхсөн зүйлийн ДНК-д гүнзгий анализ хийж, орчин үеийн чоно болон бусад ойр төрөлт амьтдын эсийн бүтцээр “шинэчлэн бүтээсэн” байна. “Бид зөвхөн нэг амьтан сэргээсэнгүй. Бид цаг хугацааг, хувьслын төгсгөл гэдэг ойлголтыг сэтлэн гарлаа” хэмээн тус компанийн үүсгэн байгуулагч Бен Ламм мэдэгджээ.
Энэ амжилт нь зөвхөн dire wolf-ийн түүхээр хязгаарлагдахгүй. Мамонт, додо, тас мэтийн амьтдыг ч ирээдүйд эргэн сэргээх боломжийг харуулж байна. Гэвч нэгэн зэрэг байгаль хамгаалагчид, био-ёс зүйчид “Мөхөл бол байгалийн жам. Хүний оролцоо хаана зогсох вэ? Энэ бүх үйлдэл, дахин сэргээх оролдлого яг зөв үү” гэсэн асуултыг хүчтэй тавьж байна.
“Colossal biosciences” энэхүү технологийг зөвхөн “соёлын сониуч зан”-гаас илүүтэйгээр экосистемийг тэнцвэржүүлэх, зэрлэг байгалийг нөхөн сэргээх зорилгоор ашиглахыг зорьж байгаа гэжээ.
