Өнгөрсөн гуравдугаар сард Донателла Версаче төрөлх брэндийнхээ бүтээлч захирлын суудлаас бууж байгаагаа зарласан билээ. Уг үйл явдлаас хойш тус брэндийн хувь заяа цааш хэний гарт очих нь загварын салбарынхны анхааралын төвд ороод байсан юм.
1978 онд дизайнер Жианни Версаче анх “Versace” брэндийг үүсгэн байгуулж, дүү Донателлатайгаа хамтран удирдаж байсан. Гэвч 1997 онд Жианни Версаче цуврал алуурчны гарт амиа алдсанаас хойш Донателла Версаче компаниа гардан удирдаж байв. Донателла бүтээлч захирлын суудлаасаа буухын өмнөх хамгийн сүүлчийн загваруудаа энэ оны хоёрдугаар сард Миланы загварын долоо хоногийн үеэр танилцуулсан. Тус брэндийн бүтээлч захирлын албыг Донателлагийн дараа “Miu Miu” брэндийн Дарио Витале хүлээж аваад байсан билээ. Харин энэ жил 69 насны босгыг алхаад буй Донателла “Versace” брэндийн ахлах элч төлөөлөгчийн албанд томилогдоод байгаа юм.
Харин тансаг хувцас эдлэлийн “Prada” брэнд өнгөрсөн лхагва гараг /2025.04.09/-т “Versace”-г 1,38 тэрбум ам.доллараар худалдан авахаар болсноо зарлалаа. 2018 онд “Versace” брэнд бүх хувьцаагаа “Capri Holdings” компанид 2,15 тэрбум ам.доллароор зарсан бөгөөд “Prada” тус компаниас “Versace” брэндийг худалдан авах хэлэлцээрийг хоёрдугаар сард эхлүүлсэн юм. Гэвч дэлхий даяар тансаг хувцас эдлэлийн брэндүүдийн эрэлт хэрэгцээ буурч, Versace санхүүгийн хүндхэн нөхцөлтэй тулгараад байсан тул бага үнээр худалдахад хүрчээ.
“Prada” нь бидний сайн мэдэх “Miu Miu”, “Church’s” зэрэг брэндүүдийг эзэмшдэг юм. Одоо “Versace” брэндийг өөртөө нэгтгэснээр “Prada” группын зах зээлийн үнэлгээ огцом өсөж, Францын “LVMH”, “Kering” зэрэг загварын салбарын аварга группуудтэй өрсөлдөхүйц хэмжээнд хүчирхэгжиж байна. “Prada” группын гүйцэтгэх захирал Андреа Гуерра “Versace”-гийн асар их нөөц бололцоог үргэлжлүүлэн амжилттай авч явахад урт хугацааны тэвчээр, сахилга бат шаардагдана” гэжээ.
