2025 оны намраас эхлэн Бээжингийн бага болон дунд сургуулиудад хиймэл оюун ухааны тухай хичээл заахаар болжээ.
Бээжингийн боловсролын хорооны мэдэгдэлд дурдсанаар, бага болон дунд сургуулиуд хичээлийн улирал бүр хиймэл оюун ухааны хичээлд зориулж дор хаяж найман цаг гаргах ёстой. Ингэхдээ үүнийг бие даасан хичээлийн хувиар орох эсвэл мэдээллийн технологийн хичээлтэй хамтатгахыг санал болгож байна.
Бага ангиудад хиймэл оюун ухааны үзэл баримтлалын талаар ойлголт өгөх бол дунд ангийн сурагчдад хэрхэн хиймэл оюун ухааныг сургалт болон өдөр тутмын амьдралдаа ашиглах талаар заах аж. Харин ахлах ангиудад хиймэл оюун ухаан, инновацын хэрэглээг өргөжүүлэх чиглэлээр хичээл орохоор болсон байна.
Энэ оны эхээр Хятадын технологийн “DeepSeek” стартап дэлхийн хиймэл оюун ухааны салбар болон санхүүгийн зах зээл дээр DeepSeek чатботыг танилцуулж, дуулиан тарьж байсан юм.
