Жүжигчин Пак Со Жүн хүүхдийн амьд аварсан тухай мэдээлэл олон нийтийн сүлжээнд цацагдаж, олны талархлыг хүлээгээд байна. Энэ тухай бичсэн гар бичвэрийг тэрбээр өөрийн инстаграм хуудаснаа оруулсан байх ба уг бичвэр нь түүнээс тусламж авсан хүүхдийн эцэг, эхийн бичсэн гар бичвэр ажээ.
Уг бичвэрт “Пак Со Жүний ачаар хүүхэд маань хагалгаагаа амжилттай хийлгэж чадсан. Хүүхэд маань 2024 оны нэгдүгээр сард тархины хорт хавдараар оношлогдсон. Бид сэтгэл санаа хийгээд санхүүгийн хувьд хэцүү байдалд ороод байсан. Хүүхдийнхээ өвчний тухай анх мэдээд энэ хорвоо дээр зөвхөн манай гэр бүлд л азгүйтэл тохиож буй мэт санагдсан. Маш их бухимдаж байсан ч одоо цус төлжүүлэх үүдэл эс шилжүүлэн суулгах хагалгааг амжилттай хийлгэж чадсан болохоор итгэлийн гэрэл асаж эхэлж байна. Бид өөр эмчилгээ хийлгэхээр хүлээж байгаа бөгөөд хүүхэд маань үүнийг сайн даван туулж чадна гэдэгт итгэлтэй байна” гэжээ.
Жүжигчин Пак Со Жүний хувьд хандивын арга хэмжээнүүдэд идэвхтэй оролцдог нэгэн. Тус хүүхдийн гэр бүлийнхэн хагалгаа хийлгэснийхээ дараа хагалгааны зардлыг Пак Со Жүн өгсөн болохыг мэдээд ийнхүү талархлын захидал илгээжээ.
Пак Со Жүн уг талархлын захидлын хариуд “Би цаашид илүү хичээнгүйлэн амьдрах болно. Эдгэрч, эрүүл саруул болсных нь дараа уулзана гэж найдаж байна” хэмээсэн байна.
Хагалгаа хийлгэсэн хүү том болоод түүн шиг алдар нэртэй нэгэн болох хүсэлтэй болсон ба ирээдүйд биечлэн уулзаж, талахлаа илэрхийлнэ гэжээ.
