Өмнөд Солонгосын хөвгүүдийн “Stray kids” хамтлаг “YouTube” платформд 20 сая дагагчтай болсноо албан ёсоор мэдэгдлээ. Тэд улсынхаа “BTS”, “Blackpink” хамтлагуудын дараах 20 сая дагагчтай гурав дахь уран бүтээлч болж байгаа юм.
Дөрөвдүгээр сарын 30-нд тэд 20 сая гэсэн тоог давсан бөгөөд тусгай бичлэг хийж, баяраа тэмдэглэсэн байна.
Тус хамтлагийн “YouTube” суваг маш олон төрөл, сэдэвтэй контент дүүрсэн, маш сонирхолтой байдгаараа онцлог. Тухайлбал, эрч хүчтэй бүжиг, дуу хөгжмөөс гадна аялан тоглолтын хөшигний ар дахь байдал гээд олон зүйлийг өгүүлдэг. Хамгийн сонирхолтой нь, өдөр тутмын амьдралаа дэлгэн харуулсан “SKZ-TALKER GO!”, хөгжилтэй, цэнгээнт шоуны «SKZ CODE” зэрэг нэвтрүүлэгтэй.
“Stray Kids” хамтлаг одоогоор дэлхийн 34 хотод 55 концерт хийх аялан тоглолтоо үргэлжлүүлж буй. Тэд тавдугаар сарын 10-18-нд Японы Шизүокад дөрвөн тоглолттой бөгөөд дараа нь тавдугаар сарын 24-нөөс долоодугаар сарын 30 хүртэл Хойд Америк, Европоор аялна. Энэ аялан тоглолтыг нийт 2,2 сая үзэгч үзэх төлөвтэй байгаа бөгөөд энэ нь к-поп хөгжмийн түүхэн амжилт болох юм.
