Монголын кинотеатруудын менежментийн холбооноос кинотеатруудаар үзэгчдийн хүртээл болгож буй Монгол уран бүтээлүүдийн нээлтийн үзвэрийн тоог төдийгүй тухайн уран бүтээлүүдийн долоо хоног, нэг сар, улирлын үзэлт болон нийт үзэгчдийн тоог гаргаж, олон нийтэд танилцуулдаг.
Тэгвэл тус холбооноос өнгөрөгч долоо хоногт нээлтээ хийсэн хоёр уран бүтээлийн эхний гурван өдрийн үзэгчдийн тоог танилцууллаа. Тодруулбал, найруулагч Ж.Сэнгэдоржийн “Чимээгүй хотын жолооч” киног 517, “Галбингаа” уран сайхны киног 4262 үзэгч үзжээ.
- Найруулагч Ж.Сэнгэдоржийн “Silent city driver” буюу “Чимээгүй хотын жолооч” кино өнгөрсөн оны арваннэгдүгээр сард дэлхийн кино урлагийн А зэрэглэлийн фестиваль болох “Talling black night film festival”-д гранпри шагнал болон шилдэг зураачийн шагнал тус тус хүртэж байв. Мөн “Asian movie pulse” вэбсайтаас 2024 оны шилдэг 30 ази кино жагсаалтыг гаргахад эл жагсаалтын 22-т “Чимээгүй хотын жолооч” кино жагссан юм. Түүнчлэн Японы Осака хотод зохион байгуулагддаг “Osaka Asian Film Festival”-ийн уралдаант хэсэгт шалгарч, өнгөрсөн гуравдугаар сард энэхүү уран бүтээлийн гол дүрд тоглосон А.Түвшинбаяр Азийн шилдэг жүжигчин шагнал хүртсэн. Тэгвэл энэхүү “Чимээгүй хотын жолооч” кино итавдугаар сарын 2-ноос бүх кино театруудын дэлгэцнээ гарч буй.
- Эх үрс, энэрхүйн тухайн өгүүлэх “Галбингаа” уран сайхны кино энэ сарын 8-аас бүх кино театрт гарч буй. Төрийн шагналт, Урлагийн гавьяат зүтгэлтэн Ш.Гүрбазарын зохиол, Б.Жаргалсайханы найруулсан киноны дууг дуучин Г.Эрдэнэчимэг дуулсан байна. Зохиолч Ш.Гүрбазар киноны нэрний тухайд “Галбингаа гэдэг нь бурхан багшийн найман хотын нэг. Энэрэхүйн амар амгалангийн хотын дээгүүр дүүлэн нисдэг үзэсгэлэнт шувууг хүмүүс ийнхүү нэрлэжээ. Аугаа их энэрэхүйг хүн хүндээ өгнө гэдэг Галбингаа шувуу донгодохын дайны баяр баясгалан юм аа” хэмээн тайлбарлажээ. “Галбингаа” киноны гол дүрд Ардын жүжигчин Ж.Оюундарь, Төрийн соёрхолт, Гавьяат жүжигчин Ц.Төмөрбаатар болон жүжигчин Г.Нарансолонго, Г.Эзэнмөнх, Э.Намуун, Г.Эрхэмбаяр, Т.Хулан нар тогложээ. Киноны ерөнхий продюсераар “Spirit mining” компанийн ерөнхий захирал Д.Мягмарсүх ажилласан бол “Мөрөөдлийн театр”-ын жүжигчин Г.Эрхэмбаярын анхны бие даан продюсерласан бүтээл болсон байна.
