69 дэх удаагийн “Eurovision” дууны уралдаан тавдугаар сарын 13-17-нд Швейцарын Базель хотноо болж, ялагчийг тодрууллаа.
37 орны хамтлаг, дуучид оролцох хагас шигшээ шатнаас 26 орны оролцогчид шувтаргын шатанд тунаж үлдсэн бөгөөд уралдааны эцсийн шатны шалгаруулалт бямба гараг /2025.05.17/-ийн орой явагдсан юм.
Энэ жилийн “Eurovision” олон улсын дууны уралдаанд Австрийн контртенор дуучин JJ буюу Йоханнес Питч “Wasted Love” хэмээх поп опера жанрын дуугаараа түрүүллээ. JJ Европ даяарх шүүгчид болон тив, дэлхийн өнцөг булан бүрээс ирүүлсэн үзэгчдийн саналаар тэргүүлсэн байна.
Өдгөө 24 настай контртенор JJ буюу Йоханнес Питч “Миний мөрөөдлийг биелүүлсэн европчууддаа талархал илэрхийлье. Хайр бол дэлхийн хамгийн хүчтэй хүч билээ. Илүү их хайрыг түгээцгээе” хэмээжээ.
Санал хураалтын дараах дүнгээр Австрийн дуучин 436 оноо авсан бол Израил /357/, Эстонийн /356/ уран бүтээлчид удаалжээ. Тодруулбал, Израилын дуучин Юваль Рафаэль “New Day Will Rise” дуугаараа хоёрдугаар байр, Эстонийн Томми Кэш “Espresso Macchiato” дуугаараа гуравдугаар байр тус тус эзэлсэн байна. Харин Шведийн оролцогч KAJ нь “Bara Bada Bastu” дуугаараа санал асуулгын дүнгээр илүүрхэж байсан боловч дөрөвдүгээрт орсон байна.
Ташрамд дурдахад, энэ жилийн оролцогчдын уран бүтээлүүдийг багтаасан цомог дөрөвдүгээр сарын 18-нд цахим хэлбэрээр, дөрөвдүгээр сарын 25-нд CD хувилбараар гарсан бол энэ сарын 23-нд пянзаар худалдаанд гаргахаар болжээ.
2025 оны “Eurovision” уралдааныг Европын өргөн нэвтрүүлгийн холбоо, Швейцарын өргөн нэвтрүүлгийн корпорац хамтран зохион байгуулсан бөгөөд тус уралдааныг албан ёсны “YouTube” сувгаараа шууд дамжуулжээ.
