“Lego” болон “Nike” компани хамтарч ажиллахаар болсноо өнгөрсөн оны наймдугаар сард зарласан. Тэгвэл уг цувралын анхны загварууд ил болж, “Lego x Nike Air Max Dn” загвар олны анхаарлыг татаж байна. Тус загвар нь зөвхөн хүүхдийн размертайгаар худалдаанд гарахаар төлөвлөгдсөн байна.
Энэхүү “Lego x Nike” коллекц нь хүүхдүүдэд зориулсан бөгөөд спорт болон бүтээлч тоглоомыг хослуулан ирээдүй хойч үеийн урам зоригийг дэмжих зорилготой аж.
“Lego Air Max Dn” пүүз нь “Lego”-гийн дүрүүдийн танил шар голлох өнгөтэй бөгөөд гутлын гадаргуу дээр “Lego” тоглоомын товгор хээг оруулж өгсөн нь онцлог болоод буй.
“Lego” компани 2021 онд “Adidas” компанитай мөн ижил төрлийн хамтарсан төсөл хэрэгжүүлж, “UltraBoost” болон “Superstar” загваруудыг “Lego” хэв маягаар шинэчилж байсан юм. Тухайн үед хэрэглэгчид пүүз дээрээ жинхэнэ “Lego” блок угсрах боломжтой байв.
