“Чингис хаан” одонт, Монгол Улсын Гавьяат жүжигчин, дуурийн дуучин Г.Ариунбаатар тавдугаар сарын 30, зургаадугаар сарын 1-нд Испанийн Менорка хот дахь алдарт “Fundació Menorquina de l’Òpera” театрт Ж.Вердийн “Аида” дуурийн Амонасрогийн дүрд дуулжээ.
Тэрбээр өнгөрсөн дөрөвдүгээр сарын 25-27-нд Ж.Вердийн “Риголетто” дуурийн шинэ хувилбарыг Большой театрын аялан тоглолтын хүрээнд Санкт-Петербургт Мариинскийн тайзнаа толилуулсан юм. Түүнчлэн өнгөрсөн жилийн сүүлийн улиралд л гэхэд тэрбээр “Марийнский” театраасаа гадна алдарт Большой театр, Франц улсын Гренобль хотын театр, Парис хотын филармони, Францын Лион хотын Дуурийн театрын тайзнаа урилгаар дуулжээ.
Тун удахгүй тэрбээр Герман, Франц, Италийн театруудад гоцолно. Тодруулбал, энэ зургаадугаар сарын 15, 19-нд Германы Берлин хот дахь “Deutsche Oper Berlin” театрт Ж.Пуччинийн “Тоска” дуурьт, ирэх долдугаар сарын 20-нд Францын “Théâtre antique d’Orange” театрт “La Forza Del Destino Verdi Version Concert” тоглолтод, ирэх наймдугаар сарын 9, 11, 13-нд “Théâtre Gallo-Romain” театрт Ж.Вердийн “Набукко” дуурьт, ирэх аравдугаар сарын 10-нд Италийн “Teatro Regio di Parma” театрт “Gala Verdiano” тоглолтод урилгаар оролцож, гол дүрүүдэд тоглохоор товлогджээ.
