Өмнөд Солонгосын “Starship” энтертайнмент өчигдөр /2025.06.02/ албан ёсны мэдэгдэл гаргаж, шинээр бүрэлдэж буй “IDID” хамтлагийн гишүүнээр сонгогдоод байсан Пак Жүн Хван хамтлагаас гарахаар болсон талаар олон нийтэд мэдээллээ.
Мэдэгдэлд дурдсанаар, Пак Жүн Хвантай холбоотой цахим орчинд тархсан цуурхлууд нь үндэслэлгүй болохыг сургууль, багш нарын мэдүүлгээр нотолсон байна. Гэсэн ч эдгээр мэдээллүүд нь насанд хүрээгүй уран бүтээлчид болох Пак Жүн Хванд сэтгэлзүйн дарамт үзүүлж, өдөр тутмын амьдрал болон сэтгэцийн байдалд нь ноцтой сөрөг нөлөө үзүүлсэн тул хамтлагаас гарах хүсэлтийг нь агентлаг хүлээн авчээ.
“Starship” энтертайэмент “Тэрбээр хичээл зүтгэлтэй, ухамсартай сурагч байсан нь албан ёсоор тогтоогдсон. Гэсэн ч үндэслэлгүй цуурхал, доромжлолын улмаас сэтгэл санааны хувьд хүнд байдалд орсон тул бид түүний шийдвэрийг хүндэтгэн дэмжиж байна” хэмээн дурджээ.
Цуурхал тараасан этгээд нь тухайн мэдээлэл баталгаагүй байсныг хүлээн зөвшөөрч, гараар бичсэн уучлалын захидал хүргүүлсэн байна. Тус этгээд нь Пак Жүн Хван, түүний гэр бүл, фэнүүд болон агентлагаас гүнээ уучлал хүссээ.
Пак Жүн Хван нь “Starship”-ийн зохион байгуулсан “Debut’s Plan” шоугаар дамжуулан “IDID” хамтлагийн гишүүнээр шалгарсан бөгөөд хамтлаг 2025 оны хоёрдугаар хагаст албан ёсоор дэбют хийхээр төлөвлөж байсан юм.
“Starship” энтертайнмент түүнийг цаашид сэтгэлзүйн дэмжлэг авч, эрүүл мэндээ сэргээх бүхий л үйл явцад нь хамт байх болно гэдгээ илэрхийлсэн байна.
