Монголын үндэсний кино урлагийн зөвлөл, “Кино гүүр хөгжлийн холбоо” НҮТББ нар хамтран “Хархорум” олон улсын кино наадмыг Монгол улсад кино урлаг үүсэж хөгжсөний 90 жилийн ойг тохилдуулан зургаадугаар сарын 27-оос долдугаар сарын 2-ны өдрүүдэд хоёр дахь жилдээ Улаанбаатар хотноо зохион байгуулна.
Тэгвэл өнөө жилийн “Хархорум” олон улсын кино наадмыг “Гарьд магнай” Монголын уран сайхны киногоор нээхээр болжээ.
Найруулагч Ж.Бунтарын 1983 онд үзэгчдэд хүргэсэн энэхүү уран бүтээл нь Монголын уламжлалт эрийн гурван наадмын нэг үндэсний бөхийн онцлог шинж чанар, зан төрх, ахуй амьдралын онцлогийг залуу бөхийн үйл явдлаар дамжуулан харуулсан юм.
Киноны товч агуулга
1910-аад оны эхэн үе. Далайцэрэн хүү багадаа өнчрөн элдэв зовлон үзэж, хар бор ажилтай ноцолдсоор бяр тэнхээтэй сайхан эр болон өсөж байгааг нутгийн өвгөн мэдэрч түүнийг даншиг наадам үзэж, болж өгвөл бөхийн аманд гарах тухай зөвлөснөөр холын аянд гарна.
Тэрээр ингэж явахдаа нэрд гарсан сайн бөх Молиго хэмээх Очир, их хүрээний наймаачин Равсал, түүний зарц Ядам өвгөн. охин Удвал нартай тохиолдоно. Очир заан Далайцэрэнг адил бөх болно гэж шинжээд түүнийг төрсөн дүүгийн нэгэн адил халамжилж, бөхийн эрдэм зааж, овооны наадмуудад барилдуулсаар бяр чадал ихтэй, барилдааны ур чадвар сайтай бөх болгоно.
Ингээд даншиг наадамд барилдан Богд хаан, эх дагина хоёрын нэрийн өмнөөс барилдсан ах дүү хоёр аваргыг унагасан нь наадамчин олны талархлыг хүлээж, харин ихэс дээдсийн таалалд нийцсэнгүЙ. Үүнээс болж түүний нандин хайр сэтгэлд занал учирч, түүний төлөө тэмцэж байгаа тухай өгүүлнэ.
“Гарьд магнай” (1983)
Ерөнхий найруулагч: Ж.Бунтар
Зохиогч: Д.Хишигт, Ш.Сүрэнжав
Зураглаач: Г.Маш
Зураач: Д.Энхболд
Хөгжмийн зохиолч: Н.Жанцанноров
Гол дүрд:
- Далайцэрэн – Д.Батдорж
- Молиго Очир – Д.Алтангэрэл
- Равсал – Б.Магсаржав
- Ядам – Р.Дамдинбазар
- Удвал – О.Уранчимэг
- Жигмэд Арслан – Б.Орхонсэлэнгэ
- Лхүмбэ – Д.Дашзэвэг
