Хүн дүрст роботуудын 3х3 хөлбөмбөгийн тэмцээн Бээжин хотноо зургадугаар сарын 28-нд болжээ. Тоглогчид болхи, удаан хөдөлгөөнтэй, дээр дээрээсээ давхаралдаж унасан, хамгаалалтад хэн нь ч онцгойлон санаа тавиагүй зэргээр хөндлөнгөөс харахад хөгжилтэй, инээдтэй тоглолт болсон боловч технологийн хувьд маш өндөр дэвшлийг үзүүллээ.
Роботуудыг ажиллуулахад хүний оролцоо огт байгаагүй бөгөөд цэвэр хиймэл оюун ухаанаар ажиллажээ. Тэдэнд суурилуулсан тусгай камерын туслалцаатайгаар бөмбөг болон эргэн тойрноо харна. Мөн унасан тохиолдолд өөрсдөө босч ирэхээр програмчилагджээ. Гэсэн ч зарим тохиолдолд бэртсэн тамирчин адил тэднийг талбайгаас дамжилж гаргах ч шаардлага тулгарч байв.
Энэ бүхний цаана хэдэн тэрбум ам.доллараар яригдах хөрөнгө, санхүүжилт бий. Хятадын робот зах зээл жилд 23 хувиар өссөөр 2028 он гэхэд 108 тэрбум ам.доллар хүрэх төлөвтэй байна. Одоогоор тус зах зээл 47 тэрбум ам.доллараар хэмжигдэж байна.
2050 он гэхэд Хятад улс 302.3 сая хүн дүрст роботыг хэрэглээнд нэвтрүүлэхээр төлөвлөжээ. Энэ нь АНУ-ын 77.7 сая роботыг хол давах үзүүлэлт юм. Тэдгээр роботыг давтамжттай үйлддэг, энгийн бүтэцтэй үйлдвэрийн ажилд дайчилна.
Хүн дүрст роботууд спортын тэмцээн уралдаанд оролцсон тохиолдол ганц үүгээр тогтохгүй. Тодруулбал, дөрөвдүгээр сарын 21-нд Бээжин хотод болсон хагас марафонд 21 робот оролцсон. Гэхдээ тэднээс ердөө зургаа нь л тэмцээнээ дуусгаж чаджээ.
Дэлхийн хүн дүрст роботуудын наадам наймдугаар сарын 15-17-ны өдрүүдэд Хятадад болно. Энэ хүрээнд гимнастик, хөлбөмбөг зэрэг 11 төрлийн спорт наадам зохион байгуулагдана.
