Чойжин ламын сүм музей 2011 оноос эхлэн жил бүр “Үдшийн музей” үйл ажиллагааг зохион байгуулж ирсэн. Энэ хүрээнд Үндэсний урлагийн их театрын гоцлол хөгжимчин, “Мөнгөн мод” наадмын 2023 оны шилдэг хөгжимчин, 2024 оны шилдэг цомог шагналын эзэн, ятгач Г.Солонгын монгол ятгын гайхамшгийг ардын хөгжмийн уянгат аялгуу, орчин үеийн электро, поп дуу хөгжмийн хэмнэлтэй хослуулсан яруу тансаг “Үдшийн музейд ятгач Г.Солонго” тоглолт болох гэж байна. Тоглолт долдугаар сарын 2-нд 19.00 цагаас болно.
Монголын үндэсний урлагийн хамгийн том “уурхай” Үндэсний урлагийн их театраар мэргэжлийн олон уран бүтээлч “овоглодог”-ийн нэг нь ятгач Г.Солонго. Зураач, барималч аавтай эл бүсгүй Хөгжим бүжгийн коллежийг төгсмөгцөө “Ханбогд” хамтлаг байгуулж, өнөөдрийг хүртэл 30 гаруй улсад аялан тоглоод буй. Сүүлийн 10 гаруй жил Үндэсний урлагийн их театрт ажиллаж буй тэрбээр оны шилдэг уран бүтээл, уран бүтээлчийг тодруулдаг “Мөнгөн мод” шагнал гардуулах ёслолоос өнгөрсөн оны шилдэг хөгжимчнөөр шалгарсан юм. Тэрбээр өнгөрсөн 2023 онд “Dreaming” ковер цомог гаргасан бол 2024 онд Монголд анх удаа гоцлол хөгжмийн пянзыг өөрийн нэрээр “Солонго” хэмээн нэрлэн гаргаж, есөн уран бүтээлээ багтаасан юм.
