БНХАУ-ын Чунчин хотноо 2025 оны долоодугаар сарын 3-7-нд зохион байгуулсан “Шанхайн хамтын ажиллагааны байгууллагын кино наадам 2025” -ын шагнал гардуулах ёслол боллоо.
Наадамд ШХАБ-ын гишүүн болон ажиглагч Хятад, Орос, Монгол, Казахстан зэрэг 10 улсын 20 уран сайхны кино уралдаант хэсэгт өрсөлдсөн бөгөөд Монгол Улсаас оролцсон “Эцэг” уран сайхны киноны найруулагч С.Баттулга “Шилдэг найруулагч”, “Шар гэгээ” уран сайхны киноны зураглаач Г.Гүенбаатар “Шилдэг зураглаач” шагналыг тус, тус хүртжээ.
Тус наадам нь долоо жилийн дараа дахин зохион байгуулагдаж буйгаараа онцлог бөгөөд 2018 оны Шанхайн хамтын ажиллагааны байгууллагын анхдугаар кино наадамд Х-ТҮЦ продакшний жүжигчин МУГЖ И.Одончимэг “Солиот эх” уран сайхны кино бүтээлээр “Шилдэг эмэгтэй жүжигчин” шагналыг хүртэж байсан билээ.
Монголын кино уран бүтээлчдийн олон улсын тавцанд гаргасан энэхүү амжилт нь сүүлийн жилүүдэд салбарын хөгжлийн шинэ түвшинд хүрч, залуу уран бүтээлчдийн бүтээл туурвил өрсөлдөхүйц хэмжээнд хүрснийг харуулсан үйл явдал боллоо.
