Зуны Олимпийн XXXIV наадам 2028 оны долдугаар сарын 14-30-нд АНУ-ын Калифорни мужийн Лос Анжелес хотноо явагдах билээ. “LA 28” Олимпын наадмын хөтөлбөрт 36 спорт багтсан. Тэгвэл эдгээр спортын уралдаан тэмцээний хуваарь гарлаа.
Хэдийгээр “Лос Анжелес -2028” олимпын наадмын нээлт долдугаар сарын 14-нд болох авч, долдугаар сарын 12-ноос уралдаан тэмцээнүүд эхэлнэ.
Тухайлбал хөлбөмбөг, сагсанбөмбөг, рагби-7, гандбол, крикет, зүлгэн дээрх хоккей, усан поло төрлүүдийн хэсгийн тоглолтууд энэ өдөр эхэлнэ.
Харин хамгийн анхны медалийн эзэд долдугаар сарын 15-нд тодрох бөгөөд триатлон, жүдо, хөнгөн атлетик, рагби-7, буудлага , сэлүүрт завины төрөлд анхны аваргууд төрнө.
Олимпын наадмын хаалтын өдөр буюу долдугаар сарын 30-нд бокс, чөлөөт бөх, марафон, дугуй, усанд сэлэлт, мөн сагсанбөмбөг, волейболын төрлийн шигшээ уралдаан, тоглолт болох юм.
“ЛА 28” олимпын наадамд тусгайлан зориулж нэг ч шинэ байнгийн спортын ордон, цэнгэлдэх хүрээлэн, барилга байгууламж барихгүй бөгөөд “Тамирчдын тосгон”-д Калифорнийн Их сургуулийн оюутны байрыг ашиглах ажээ.
Мөн алдарт “Rose Bowl”, “Los Angeles Memorial Coliseum” цэнгэлдэхүүд Олимпын наадмын уралдаан тэмцээнийг гурван удаа (1932,1984,2028) хүлээн авсан анхны цэнгэлдэх хүрээлэнгүүд болох юм.
Лос Анжелес болон түүний дагуул хотуудаас гадна Сан Диего, Сан Франциско хотуудад хөлбөмбөгийн тоглолтууд явагдах ажээ.
Зуны олимпын ХХХIV наадам эхлэхэд 1094 хоног үлдлээ.
