Ирэх есдүгээр сард “Crhisty” хэмээх намтарчилсан уран сайхны киног дэлгэцэнд гаргахаар товложээ.
Алдарт промоутер Дон Кингтэй гэрээ байгуулсан анхны эмэгтэй боксчин Кристи Мартины түүхээс сэдэвлэсэн энэхүү киноны гол дүрийг жүжигчин Сидни Суини бүтээсэн байна. “Euphoria” цуврал болон “White Lotus”-ийн дүрээрээ олны танил болсон 27 настай жүжигчин бүсгүй шинэ дүрдээ хувирахын тулд 15 кг жин нэмсэн гэнэ.
“Эмэгтэй Рокки” гэх хочтой Кристи Мартинтай төстэй бие галбиртай болохын тулд Сидни Суини өдөрт гурван удаа бэлтгэл хийж байжээ. Өглөөдөө биеийн хүчний бэлтгэл, дараа нь гурван цагийн турш боксын бэлтгэл, түүний дараа дахиад хүчний бэлтгэл хийж байсан тухайгаа ярьсан байна. Мөн цаг хагас тутамд юм идэх шаардлагатай болжээ. Учир нь “ургуулсан” 15 кг-аа алдахгүйн тулд цаг тутамд шахуу идэх шаардлагатай байсан аж.
“Өөр хүн болж хувирч буйгаа мэдрэх гайхалтай байсан. Миний бие галбир тэс өөр болж байлаа. Хувцаснуудынхаа нэгд нь ч багтахаа больтлоо таргалсан. Ердийн цагт бол би 23 размерын жинс өмсдөг. Гэвч тэгэхэд 27 размер арай гэж таарч байлаа. Хөх маань их том болсон. Бөгс ч гэсэн. Үнэхээр галзуурч байгаа мэт. Биеэ хараад “Ээ, бурхан минь” гэж бодож байгаа юм чинь. Гэхдээ маш их хүчтэй, бүр галзуу хүчтэй болсон маань сайхан санагдсан” гэж их гоё хөхтэй гэж магтагддаг Суини ярьсан байна.
Сидни Суинигийн танигдахгүй болтлоо хувирсан эл кино ирэх есдүгээр сард Торонтогийн кино наадмаар нээлтээ хийх юм байна.
Ташрамд дурдахад, боксчин Кристи Мартины одоо 57 настай бөгөөд тэрбээр мэргэжлийн боксын рингэнд 59 тулаан хийж, 49 ялсан. Үүнийхээ 32-ийг нь нокаутаар ялсан тамирчин юм. Эмэгтэй хүн боксоор хичээллэж, мэргэжлийн тулаанд орох ёстой гэж олон нийтийг хүлээн зөвшөөрүүлсэн хүн гэж түүнийг үздэг. Маш дайчин, тэвчээртэй, харизмтай тамирчин тул амьдаараа боксын домог болсон юм.
