Манай улс шинжлэх ухааны судалгааны үнэ цэн, нөлөөллийн индексээр дэлхийн 221 орноос 137, Азид 39 дүгээр байрт жагсжээ. Энэхүү эрэмбийг Туркийн эрдэмтэн Мурад Алпер, Чихан Догерын хамтран байгуулсан, Британид төвтэй “AD scientific index” үнэлгээний байгууллага шинжлэх ухааны нээлт, инновацын бүтээгдэхүүний баталгаажуулалт, хувь судлаач, эрдэмтний гүйцэтгэлийн индекс, эрдэм шинжилгээний байгууллага, судалгааны хүрээлэнгийн идэвхтэй үйл ажиллагаа зэрэгт үндэслэн 2021 оноос гаргаж эхэлсэн байна.
Өнөө жилийн индексийг тооцохдоо 221 улс дахь 24 мянга гаруй байгууллагын 2.6 сая судлаач, эрдэмтнийг хамруулжээ. Шинжлэх ухааны салбарт хамгийн нөлөө бүхий улсын тэргүүнд АНУ, Британи, БНХАУ бичигдсэн аж. Эдгээр орон олон улсад хүлээн зөвшөөрөгдсөн судалгааны байгууллагын болон 1000 хүн тутамд ногдох эрдэмтэн, судлаачийн тоогоороо ч эхний байруудад оржээ. Тухайлбал, АНУ-д энэ чиглэлийн 3200 орчим төв, хүрээлэн, 460 мянга гаруй судлаач бий бол БНХАУ-д 1160-аад байгууллага, гүйцэтгэл өндөртэй 105 мянган эрдэмтэн бий гэнэ.
Харин манай улсад эрдэм шинжилгээ, судалгааны чиглэлээр ажилладаг их, дээд сургууль, хүрээлэн, төв нийлсэн 17 байгууллага идэвхтэй үйл ажиллагаа явуулж байна. Олон улсын хэмжээнд хүлээн зөвшөөрөгдсөн, импакт фактор өндөртэй сэтгүүлүүдэд нийтлэл, өгүүлэл тогтмол хэвлүүлдэг 900 гаруй судлаач эдгээрт ажилладаг аж. Тэгвэл энэ судлаачдын h-index буюу нийт бүтээлийн болон эшлэлийн үзүүлэлт 20-41, эдгээрийн харьцаа 0.61-ийн хооронд буй нь дунджаас дээгүүр түвшний үзүүлэлт гэдгийг дээрх байгууллагаас онцолжээ. Монгол Улсын шинжлэх ухааны салбарын бүтээмж, нөлөөллийн индексийн үнэлгээнд МУИС, ШУТИС, ШУА-ийн эрдэмтэн, судлаачдын хувь нэмэр, үүрэг голлох нөлөөтэйг ч дурдсан байна.
