“Netflix”-ийн “KPop Demon Hunters” анимейшн кино нээлтээ хийснээс хойш, үзэлтээрээ тэргүүлж “Netflix”-ийн шилдэг 10 киноны жагсаалтад багтаад буй. Өмнөд Солонгосын охидын хамтлагийг харуулах энэхүү анимейшн нь олон улсад эрчээ аваад байна. Үзэгчид “Hunter/X” болон “Saja Boys” хамтлагийг бодит хамтлаг мэт хүлээн авч, дараагийн уран бүтээлийг хүлээхэд хүрээд буй.
Анимейшн охидын хамтлаг болох “Hunter/X”-ийн “Golden” хэмээх дуу нээлтээ хийснээсээ хойш хэдхэн долоо хоногийн дотор асар хурдтай дэлхийг байлдан дагуулж, “Billboard”-ийн хамгийн өрсөлдөөнтэй жагсаалтуудыг тэргүүлж, түүхэнд байгаагүй амжилт тогтоолоо.
Энэ долоо хоногт “Golden” дуу “Streaming Songs” жагсаалтын хоёрдугаар байрнаас тэргүүн байр руу урагшилж, АНУ-ын хамгийн их тоглогдсон дуунуудын жагсаалтыг тэргүүлсэн анхны охидын хамтлаг болж түүхэнд нэрээ бичлээ. Өмнө нь бодит, эсвэл зохиомол аль ч охидын хамтлаг энэ амжилтад хүрч байгаагүй юм.
Мөн уг дуу “Billboard Global 200” болон “Global Excl. U.S.” жагсаалтад дахин тэргүүлж, хоёр дахь удаагаа дэлхийн №1 хит болж байна.
“Hunter/X”-ийн асар хурдтай амжилт нь ганцхан дуугаар хязгаарлагдахгүй. Тэдний ард буй “KPop Demon Hunters” кино өөрөө ч “Netflix” дээр дэлхий даяар өндөр амжилтад хүрээд байна. Уран сайхны хувьд к-поп урлаг, тулаант, уран зөгнөлт олон элементүүдийг хослуулсан уг кино гарсан даруйдаа “Netflix”-ийн дэлхийн №1 үзэлттэй уран бүтээл болж, 70 гаруй орны жагсаалтыг үзсэн тоогоороо тэргүүлсэн юм.
