Дэлхийн хэмжээнд үзвэр үйлчилгээ, телевиз, энтертайнмент зэрэг салбарт жил ирэх тусам хүчээ авч буй технологийн дэвшил бол стрийминг үйлчилгээ юм. Олон сувагтай кабелийн телевиз үздэг байсан хэрэглэгч нар сүүлийн 20 орчим жилийн дотор “Netflix”, “Hulu”, “HBO Max” зэрэг стрийминг үйлчилгээний аппликейшны хэрэглэгчид болж хувирсан. Гэвч эдгээр платформуудын дундаас нэг нь ирэх жилээс бүрмөсөн зогсоож, хаахаар болжээ.
“Disney” компанийн зүгээс “Hulu” платформыг 2026 онд хааж, өөрсдийн давхар хөгжүүлж буй “Disney+” платформтой нэгтгэхээр болсноо лхагва гараг /2025.08.06/-т зарласан байна.
Дээрх мэдэгдлийг “Disney” компанийн гүйцэтгэх захирал Боб Игер, санхүү хариуцсан захирал Хью Жонстон нар компанийн хоёрдугаар улирлын орлогын тайланг танилцуулах үеэрээ мэдэгджээ. Энэхүү зоримог шинэ төлөвлөгөө нь “Hulu” болон “Disney+” аппликейшны үйлчилгээг нэгэн үндсэн платформ болгон нэгтгэх томоохон санаачилгын нэг хэсэг юм гэж Игер, Жонстон нар хэлсэн байна. Ингэснээр хэвлэл мэдээллийн компани илүү өнгөлөг хэрэглэгчийн интерфэйсийг санал болгохын зэрэгцээ өөрсдийн програмын үр ашгийг дээшлүүлж, платформын сурталчилгааны үйлчилгээгээр дамжуулан орлогоо нэмэгдүүлэх болно гэж найдаж байгаа ба энтертайнмент, кино, дуу хөгжим, гэр бүлийн хөтөлбөр, мэдээ мэдээлэл, спортын контентуудыг нэгдсэн нэг платформд байршуулах болно гэдгийг онцолжээ.
Хоёр платформын контентуудыг нэгтгэх ажлыг хэдийнээ эхлүүлээд байгаа бөгөөд ирэх саруудад Hulu платформын контентын санг “Disney+” платформын санд оруулах ажил хийгдэх ажээ.
