Чилийн Патагония бүс нутгаас үлэг гүрвэлийн үед амьдарч байсан хулгана шиг хэмжээтэй бяцхан хөхтөн амьтны чулуужсан үлдэгдэл олджээ.
“Yeutherium pressor” гэдэг нэртэй уг амьтан 30-40 грамм жинтэй бөгөөд 74 сая жилийн өмнө Цэрдийн галавын үед амьдарч байжээ. Ингэснээр тухайн цаг үед амьдарч байсан, Өмнөд Америкийн энэ бүс нутгаас олдсон хамгийн жижиг хөхтөн амьтан энэ болж байна.
Чилийн их сургууль болон Чилийн эртний хөхтөн амьтдын судалгааны төвийн судлаачдын багийг ахалсан Ханс Пушелийн хэлснээр, уг олдвор нь араа шүдтэй эрүүний жижиг хэсэг болон өөр хоёр араа шүдний ёзоор юм.
Энэхүү нээлтийн талаар энэ сард Их Британийн шинжлэх ухааны “Proceedings of the Royal Society B” сэтгүүлд нийтэлжээ. Судлаачид Сантьяго хотоос өмнө зүгт 3000 км-ийн зайд орших Чилийн Магалланес мужийн Рио де Лас-Чайнасын хөндийгөөс уг үлдэгдлийг олсон байна.
“Yeutherium pressor” нь жижиг мэрэгчтэй төстэй хэдий ч нугасан хошуут шиг өндөглөдөг, эсвэл имж, опоссум зэрэг шиг үр төлөө уутандаа тээн явдаг хөхтөн амьтан байсан гэж таамаглаж байна. Шүднийх нь хэлбэрээс үзэхэд харьцангуй хатуу ногоогоор хооллодог байжээ.
Эдгээр бяцхан хөхтөн амьтан нь тухайн үеийн үлэг гүрвэлүүдийн адилаар 66 сая жилийн өмнө Цэрдийн галавын төгсгөлд гэнэт устаж үгүй болжээ.
