К-поп урсгалаар уран бүтээлээ туурвидаг Өмнөд Солонгосын “Seventeen” хамтлаг Олон улсын залуучуудын өдрийг тохиолдуулан НҮБ-ын Боловсрол, шинжлэх ухаан, соёлын байгууллагад /ЮНЕСКО/ 250 мянган ам.доллар хандивлажээ.
Буяны үйлсэд зориулсан “Joopiter Gifts: sacai x Seventeen” хэмээх дуудлага худалдааны явцад цугларсан хандивын мөнгийг мягмар гарагт НҮБ-ын агентлагт гардуулан өгсөн тухай хөвгүүдийн хамтлагийн менежментийг хариуцдаг “Pledis Entertainment” агентлаг мэдээлсэн байна. Энэхүү хандивыг ЮНЕСКО-той хамтран зохион байгуулж буй Дэлхийн залуучуудын тэтгэлэгт хөтөлбөрийг хэрэгжүүлэхэд зарцуулах ажээ.
“Seventeen” хамтлаг ЮНЕСКО-гийн залуучуудын сайн санааны элчээр ажилладаг юм. 2023 онд 13 гишүүнтэй тус хамтлаг Парис хотноо ЮНЕСКО-гийн Ерөнхий Ассамблейн чуулганы үеэр хоёр жил тутам нэг удаа болдог ЮНЕСКО-гийн залуучуудын 13 дахь чуулга уулзалтад оролцон үг хэлж, уран бүтээлээ толилуулж байв. Ингэснээр тэд ЮНЕСКО-гийн томоохон чуулганд оролцож үг хэлсэн анхны К-поп уран бүтээлчид болсон юм.
“Seventeen” өнгөрсөн жил ЮНЕСКО-гийн залуучуудын төлөөх сайн санааны элчээр томилогдсоныхоо дараа тус байгууллагатай хамтран дэлхийн залуучуудыг дэмжих хөтөлбөрийг санаачилж, нэг сая доллар хандивлажээ. Одоо энэ мөнгийг сайн сайхан ирээдүйн төлөө өөрсдийн санаачилсан төслүүдийг хэрэгжүүлж буй дэлхийн өнцөг булан бүр дэх залуучуудын 100 багийг дэмжихэд зарцуулж байна.
“Бид анх уран бүтээлээ туурвиж эхэлснээсээ хойш өнөөг хүртэл өөрсдийн үзэж туулсан туршлага, сэтгэл хөдлөлөө хөгжмөөр дамжуулан илэрхийлж ирсэн учраас Олон улсын залуучуудын өдөр бидний хувьд илүү утга учиртай санагддаг. Бид дэлхийн өнцөг булан бүрд хүсэл мөрөөдлийнхөө төлөө хичээнгүйлэн зүтгэж буй бүх залууст урам зориг бэлэглэхийг хүсэж байна” гэж тус хамтлагийн мэдэгдэлд дурджээ.
