Хөгжмийн стриминг платформ Spotify нэгэн шинэ үйлчилгээг нэвтрүүлэх гэж байгаа тухайгаа албан ёсны хуудсаараа дамжуулан мэдээллээ. Энэхүү шинэ үйлчилгээний тусламжтайгаар хэрэглэгчид аппликейшний тусгай хэсэгт дуртай дуу, подкаст, аудио номоо бусадтай хялбархан хуваалцаж, хоорондоо чатлах боломжтой болно.
Компанийн мэдээлснээр хувийн зурвасууд нь маш найдвартай системээр хамгаалагдах тул хэрэглэгчдийн нууцлал бүрэн хангагдана гэдгийг мэдэгджээ. Мөн энэхүү үйлчилгээ нь бүх ангиллын хэрэглэгчдэд адилхан нээлттэй байх бөгөөд зурвас илгээх үйлчилгээ нь нэмэлт хамгаалалтын боломжуудыг давхар бүрдүүлж буй. Тухайлбал хэрэглэгч харилцах хүсэлтийг хүлээн зөвшөөрөх эсвэл татгалзах, зөрчил гаргасан хэрэглэгчийг мэдээлэх, зурвас авах хүсэлтийг бүрэн хаах боломжуудыг тус тус багтаажээ.
Түүнчлэн Spotify-ийн хувийн зурвас илгээх үйлчилгээ зөвхөн 16 наснаас дээш хэрэглэгчид ашиглах нөхцөлтэйгөөр хэрэгжүүлэхээр төлөвлөжээ.
