Соёл урлагийн их сургууль, Улсын драмын эрдмийн театрын хамтран хэрэгжүүлж буй ажлын байранд суурилсан “Жүжиглэх урлаг хөтөлбөр”-ийн нээлтийн үйл ажиллагаа ёслол төгөлдөр болж өндөрлөлөө.
1990-1992 онд нэрт найруулагч Г.Доржсамбуугийн санаачилгаар анхны “Театр студи” ангийн жүжигчдийг бэлтгэх сургалтыг эхлүүлж байсан арвин баялаг уламжлалтай. Уг уламжлалыг үргэлжлүүлэн баяжуулж Г.Доржсамбуугийн нэрэмжит ажлын байранд суурилсан бакалаврын зэрэг олгох “Жүжигчний ангийн хөтөлбөр”-ийг хэрэгжүүлж эхэллээ.
Нээлтийн үйл ажиллагаанд УДЭТ-ын захирал, Төрийн соёрхолт, УГЗ Н.Наранбаатар, СУИС-ийн сургалт эрхэлсэн проректор Д.Одсүрэн, нэрт найруулагч Г.Доржсамбуугийн гэр бүл, шавь нар, театрын ахмад уран бүтээлчид оролцлоо.
Хөтөлбөрийн нээлтийн үеэр шинэ хичээлийн жилийн эхлэлийг билэгдэж цан цохиж, Үндэсний урлагийн их театрын найрал хөгжим, УДЭТ-ын уран бүтээлчдийн урлагийн тоглолт өрнөж, энэ хичээлийн жилд элсэн суралцаж буй 30 оюутнуудын төлөөлөл хичээлийн анхны хонх цохин шинэ хөтөлбөрийн эхлэлийг тунхаглав.
Энэхүү ажлын байранд суурилсан “Жүжиглэх урлаг хөтөлбөр” нь дөрвөн жилд нэг удаа элсэлт авах бөгөөд жүжигчний мэргэжлийн хичээлүүдийг УДЭТ-ын найруулагчид, жүжигчид, мэргэжлийн урлагийн байгууллагын мастер багш нар зааж, ажлын байранд суурилсан бакалаврын сургалтыг зохион байгуулна.
Тус хөтөлбөрийн зорилго нь залуу жүжигчдийг уран бүтээлийн бодит орчинд сургах, мэргэжлийн ур чадварыг хөгжүүлэх шинэчлэлтэй хөтөлбөр бөгөөд ахмад, дунд үеийн уран бүтээлчид залуу үеийнхэндээ мэргэжлийн нандин өвийг уламжлуулж буй онцлогтой билээ.
