Хятадаас олдсон нэг сая жилийн өмнөх хүний гавлын яснаас Хомо сапиенс буюу орчин үеийн хүн анх тооцоолж байсан хугацаанаас хамаагүй өмнө үүссэн болохыг тогтоожээ. Тодруулбал, энэхүү олдворын тусламжтай орчин үеийн хүн төрөлхтөн өмнө нь таамаглаж байснаас дор хаяж хагас сая жилийн өмнө үүссэнийг тогтоосон байна.
Бид Неандерталь зэрэг өмнөх үеийн хүмүүстэй зэрэгцэн оршиж байсныг мөн илтгэж байгааг судалгааны үр дүн онцолжээ. Энэ нь хүний үүсэл хөгжлийн талаарх цаг хугацааны ойлголтыг хамаагүй урагшлуулсан үйл явдал боллоо хэмээн судалгаан дээр ажилласан эрдэмтэд тодотгож байна.
Эрдэмтэд “Yunxian 2” нэртэй уг гавлын ясыг сая жилийн өмнөх гэж тогтоосныхоо дараа Хомо эрэктус буюу том тархитай эртний хүний төрөлд хамааруулж байжээ. Тэднийг Хомо сапиенсуудын өмнөх үе гэж үздэг.
Хомо эрэктус нь 600 мянган жилийн өмнө хувьсаж Неандерталь болон Хомо сапиенс гэсэн хоёр төрөлд хуваагдсан гэж үздэг юм.
Харин саяхны шинжилгээнд үндэслэн “Yunxian 2” нь Хомо эрэктус бус харин Неандерталь болон Хомо сапиенстэй зэрэгцээ түвшний хөгжлийн шатанд байсан “Хомо лонги” төрөлд хамаарна гэж тодорхойлсон аж.
