2014.IV.1-IV.19. 976 галерей хоёр жилийн ойдоо зориулан өнгөрсөн баасан гаригт “Contemporary art exhibition II” үзэсгэлэнг нээлээ. Тус үзэсгэлэнд уран бүтээлч Г.Мөнхболор, М.Батзориг, Бу.Бадрал, Годо буюу Д.Баярцэцэг, С.Ганзүг, Д.Үүрийнтуяа, У.Нарбаясгалан, Б.Нандин-Эрдэнэ, Б.Энхчулуун, Г.Гэрэлхүү, Б.Энэрэл, Э.Энхзаяа, түүнчлэн "Хүн, байгаль, хайр, эрх чөлөө" хөдөлгөөний цоо шинэ бүтээлүүдийг дэлгэн харуулах юм.
Үзэсгэлэнд зураач М.Батзориг “Баримт” хэмээх томоохон хэмжээтэй бүтээлээ дэлгэсэн бөгөөд үүнд таван хошуу гол бэлгэдэл болж байна. Зураач энэ тухай “Гал улаан таван хошуу миний болон өмнөх үеийнхний дурсамжийнх нь бэлгэ тэмдэг байсан нь одоо ч хэвээр. Бид үүнээс яаж ч зугтаж, булзааруулах гээд нэмэргүй. Баримт л бол баримт. Түүнчлэн энд дүрсэлсэн олон давхар жааз, хүрээгээр нийгмийн зүгээс хүнд, хүний дурсамжинд, өөрийнхөөрөө байх эрх чөлөөнд нь ирж буй дарамтыг, нөгөө талаас хүний аливааг байгаагаас нь гоё харагдуулах гэсэн хүслийг бэлгэдсэн гэж хэлж болно. Магадгүй энэ нь ихэнхийн маань мартахыг хичээх эсвэл мартчихсан ч байж болох тэрхүү баримтат дурсамж” хэмээн тайлбарлав. Тэгвэл түүний эхнэр, зураач Д.Үүрийнтуяагийн “Тэнгэрт” бүтээлд өргөгч цамхаг, үйлдвэрийн яндан дунд цаасан шувууд, хэрээнүүдтэй зэрэгцэн хөөрч буй нь үзэгдэнэ. “Хөл толгой нь ч олдохгүй энэ хотод үнэт зүйлсээ хадгалан хамгаалж, өөрийн орон зайг бий болгохыг хичээж байна” хэмээн тэрбээр ярьлаа.
Эмэгтэйчүүд, хүүхдийн хүчирхийллийн эсрэг сэдэвтэй коллажуудаараа танигдсан Б.Нандин-Эрдэнийн хувьд “The Hand” бүтээлээ үзэсгэлэнд дэлгэжээ. Тэрбээр энэ талаар “Бүтээлдээ өнөөгийн нийгмийн нэгээхэн хэсэг болох чимээгүй дарангуйлалд өртөгсөд, тэдний дотоод сэтгэлд үүсэх хувь хүний сэтгэл зүйн өөрчлөлтийг харуулахыг зорисон” гэлээ. Тэгвэл мөн л энэ цаг үеийн чухал асуудлын нэг уул уурхайгаас үүдсэн сүүдэр, бараан талыг У.Нарбаясгалан “Олборлогдсон эс олборлогдсон”, “Орд”-ууддаа гаргасан аж. Хүртээмжгүй, тэгш бус баялгийн хуваарилалт нь нийгмийн давхаргуудын ялгааг улам гааруулж, оюун санаанд тулгуурласан баялаг бүтээх бололцоог хаагдуулсаар хэмээн тэр үзэж байна. Харин Б.Энхчулуун алдартнуудын хөргийг зурсан оп арт ажлуудаараа өнгөрсний эдүгээд ч үзүүлэх нөлөө, зогсолтгүй эргэх хэмийг бэлгэджээ. Үүнээс гадна монгол зураг, япон мангаг сүлсэн мэт ажлуудаараа танигдсан Г.Гэрэлхүү хүний амьдрал тоглоомын талбайгаас тэгтлээ ялгаагүй гэсэн утгад зангидсан “Хүүхэд шиг” зургаа дэлгэсэн бол түүний эхнэр, зураач Э.Энхзаяа “Аялал” хэмээх зураг-видео ажлаа тавьсан юм. Үйл хөдлөлийн урлагаараа танигдсан С.Ганзүг тус галерейд өнгөрсөн онд үзүүлсэн “Толгойгоо ух” перформансын фото ажлуудаа дэлгэжээ.
Үзэсгэлэнгийн өөр нэгэн сонирхолтой хэсэг бол Годо буюу Д.Баярцэцэгийн “Абсурд өрөө” хэмээх бүлэг ажил. Танхимын зүүнтээ байрласан “Абсурд өрөө”-нд түүний амьд явсан үеийн тэдгээр хөргөөс гадна унтдаг байсан төмөр ор, сонсох дуртай хөгжим, уншиж асан ном, үнсний сав сэлт нь бий. Харин уран бүтээлч нээлтийн үеэр зохиолчийн магад байх үеийн нь төлөвт орсон гэмээр перформансаа тавьсан юм.
Тэгвэл “Хүн, байгаль, хайр, эрх чөлөө”-гийн “Саран өлзийт үлэмж бадрангуй гэгээн асралт наран” хэмээх мультимедиа ажил юм. Амьдрал тийш эрчлэн зүглэх үй түмэн эсийг дүрсэлсэн эсгийгээр бүтээсэн тэр бүхээгт орвол салхи зөөлнөөр үлээх бөгөөд сэрчигнээнд нь цагаан хадагс хийсэлдэнэ. Тэнд тусгасан нар мандах агшин, шувуудын нисэлдээн, модод байгальд очсон мэт уужирал, тайвшрах мэдрэмжийг төрүүлнэ. “Нэгэнтээ байгаль ижийн хайр хүмүүн төрөлхтөнг эрх чөлөөгөөр ивээсэн шиг тайван, амар амгалан байх хэрэгтэй…” хэмээн тэд уриалж байна. Бас нар, дэлхий, газар шорооноос үргэлж энэрэхийг гуйсан залбирал бүтээлд нь туссан. “Наран бурхан танаас хүлцэл өчье. Надад өгсөн дулаан, гэрлээ бусдад бас түгээгээсэй гэснийг тань бид мартаа юу..?”
www.URLAG.mn
