Дархан-Уул аймгийн засаг даргын нэрэмжит оны шилдэг шүлэг шалгаруулах уламжлалт “Гал өд” яруу найргийн наадам уржигдар /2025.10.22/ “Залуучууд” театрт боллоо. Энэ жилийн наадамд нийт 20 зохиолч оролцон, шүлэг, найргаа 130 гаруй үзэгчийн өмнө уншлаа. Наадмыг зохиолч, сэтгүүлч, Соёлын гаьяат зүтгэлтэн Б.Норовсамбуу, ахмад яруу найрагч, зохиолч Н.Шоопор, Р.Лхамрагчаа нар шүүв.
Эхний шатанд 36 оролцогч өрсөлдөн, хоёрдугаар шатанд 20 шүлэгч шалгарч, үзэгчдэд шүлгээ толилуулсан байна. Гурав дахь шатанд 10 яруу найрагч шалгарч, шилдэг таван яруу найрагч тодорчээ. Үүнд:
- Тэргүүн байр – Б.Бүрэнцог,
- Дэд байр – Н.Бадамдорж,
- Гутгаар байр – Б.Баатарням,
- Тусгай байр – Мөнхням,
- Тусгай байр – Ичинхорлоо,
- МЗЭ-ийн Дархан-Уул аймаг дахь салбарын шагналд – Д.Нандинцэцэг нар шалгарч өргөмжлөл, мөнгөн шагналын эзэд боллоо.
Энэ жилийн “Гал өд” яруу найргийн наадамд залуучууд, оюутан, сурагчид идэвхтэй оролцов. Тус аймгийн Хүүхдийн номын ордон үзэгчдийн дунд сугалаат азтан шалгаруулж, 32 үзэгчийг урамшуулав.
Ийнхүү Дархан-Уул аймгийн уран бүтээлчид, шүлэг найргийн сонирхогчдын хүсэн хүлээдэг “Гал өд 2025” яруу найргийн наадам амжилттай болж, оны шилдэг шүлэг, шилдэг найрагчдаа тодрууллаа.
