АНУ-ын сэтгэл судлаач, Нью-Йоркын их сургуулийн профессор Жонатан Хайдтын “The Anxious Generation” хэмээх шинэ бүтээл Z үеийн залуусын сэтгэл гутрал, түгшүүр яагаад огцом нэмэгдсэнийг судалжээ.
Энэхүү үзэгдлийн гол шалтгааныг нийгмийн сүлжээ болон ухаалаг утасны хэт хэрэглээтэй холбон тайлбарлаж, технологийн эрин үе залуусын сэтгэлзүйд урьд өмнө байгаагүй нөлөө үзүүлж буйг онцолсон байна.
Тэрбээр “Ухаалаг утас бол залуусын сэтгэцийн дархлааг хамгийн түрүүнд сулруулдаг орчин үеийн хэрэглээ” гэж тодорхойлжээ.
Номын үзэл санаанаас үүдэн “The Anxious Generation” нэртэй нийгмийн хөдөлгөөн байгуулагдаж, олон нийтийн эрүүл мэнд, хүмүүжлээс өгсүүлээд бодлогын түвшинд анхаарал татаж эхэллээ.
“The Anxious Generation” хөдөлгөөн өсвөр үе болон бага насны хүүхдүүдийн ухаалаг утасны хэрэглээг багасгах, тэднийг илүү бие даасан, оролцоо шаардсан туршлагад татан оролцуулахад чиглэж байна.
